Loije muklum kata hpang jahtum ngam nga ai, myen hpyendap (HKLY-142) hpe Wunpawng Mungdan Shanglawt Hpyendap-KIA gaw, 2024 April shata praw 8 ya shani, hpang jahtum tawn nna, laknak jahkrat na matu sadi jaw da ai lam na chyelu ai.
“ Loi Je hpyendap na myen ni hpe daini 8/April/2024 ya shani hpang jahtum tawn nna, laknak jahkrat na matu KIA maga na tsun da ai nga chye lu ai,” nga Loi Je muklum na, jau man masha langai tsun wa ai.
Loi Je muklum kata na, ngam nga ai, myen hpyen hpung ni, Laknak n jahkrat jang gaw, KIA Kawn htim gap na masa nga ai hte, April praw 8 ya shani gaw, loije kata gat seng ni yawng hpe mung pat tawn da na matu, KIA maga na ndau da ai hte, mung shawa ni hpe mung shim ai shara de gan yen na matu tsun da ai nga, dai jau man masha wa tsun ai.
2024 March shata 27 ya kaw nna Manmaw hte Loije lam lapran hta shara la dap jung nga ai Myen hpyendap ni hpe KIA maga na htim gasat zing madu hpang wa sai re hte, dai myen hpyendap ni hta na, ahkyak ai Loije hpe makawp maga ya nga ai Yaw Yung myen hpyendap hte Mada bum myen hpyendap lahkawng hpe KIA maga na, 2024 March shata 28 ya shani htim gasat zing madu la ngut ai hpang, March shata 29 ya shani kaw nna Loije mare kata de KIA ni shara la shang hpang wa sai rai nga ai.
KIA ni Loije kata de shang shara la wa ai majaw, Loije kata na myen gumshem dap a magam gun ni gaw miwa hkran hku nna pru mat wa na matu, KIA hte jahkrup la lu ai raitim, Miwa Asuya hku nna Shan hte a mungdan kata de, lai shang na ahkang pat hkum tawn da ai re hte jarit mayan hkan majan nshabyin na matu mung, hpyi shawn da ai lam nga ai re hpe na chyelu ai.
Myen gumshem hpyendap npu na, masha pru shang gawn hkang dap, balik dap hte kaga magam dap hkan na magam gun ni hte Yawng Yung myen hpyendap kaw nna hprawng pru wa ai byuhamu hte hpawn, myen hpyenla ni yawng pawng, marai 100 jan daram gaw, HKLY (142) dap kaw, wa makoi mahkawng rawng nga ai re lam chyelu ai.
Ya ten hat, KIA hpyen hpung ni gaw, Loije mare kata na, Myen Hpyen asuya a Balik dap, Immigration Rung, Tsi rung, magam dap ni hte kaga ahkyak ai rung ni hpe sadi laika pa shakap nna, pat hkum tawn da sai re hte, Loije muklum kata hte ni nawn ai mare kahtawng kaw na mung shawa ni hpe shimlum ai shara de htawt sit na matu mung, sadi jaw ndau shana da ai lam Loije muklum na, jau man masha wa tsun ai.
Ya ten hta loije muklum kata hpang jahtum ngam taw nga ai myen hpyen dap hpe KIA hpyen hpung kawn, ni htep ai hku wang shinggrup nna, shanhte a shamu shamawt ai lam ni hpe mung, dingyang yu sin let, masam maram nga ai re lam na chyelu ai.
