Wai Maw gingwang Wu Yang mare kaw, jep san shara jahkrat tawn da ai, Wuyang Lisu pyitusit a hpyen dap hpe Wunpawng Mungdan Shanglawt Hpyendap-KIA kawn, 2024 April shata praw 5 ya shani sa htim gasat ai hpang, Wuyang mare hte Lum Yang mare hta laja lana majan byin wa ai re hpe chye lu ai.
Dai zawn majan byin wa ai hta, Wu Yang pyitusit ningbaw wa a nta hte myen gumshem dap hte seng ai ni a nta 7 daram hpe KIA kawn wan nat jahten kau ya sai re.
Dai hpang pyitusit maga na mung, shanglawt magam gun ni a nta re ngu maram lu ai nta ni hpe, matai htang ai hku nna, wan nat jahten hkawm wa sai re lam, ginra masha langai tsun dan wa ai.
Ya ten hta, dai ginra kata, majan laja lana nbyin shi ai rai tim, shani shagu ngu na daram KIA hte pyitusit ni Wu Yang mare kata shamu shamawt hkawm nga ai re lam, dai buga masha wa tsun ai.
“Ya yang gaw shani rai yang pyitusit ni mare kata shamu shamawt hkawm nna shana rai yang gaw KIA ni bai shamu shamawt hkawm rai nga taw ai. Kalang lang shanhte hkrum hkat ai ten gaw ang katut gasat gala kaji kajaw ni gaw ding yang naw byin nga ai re,” nga dai buga masha wa tsun ai.
Dai zawn byin nga ai masa lam a majaw, mung shawa ni gaw shana rai yang ni nawn ai nam kata de koi yen mat nna, shani ten hta, tinang a dum nta de bai wa nna, dusat yam nga ni hpe shat wa jaw sha ngut ai hpang, tinang koi yen ai shara de bai wa yup rai, galaw nga ma ai re lam, dai buga masha wa tsun ai.
