Htawng dam 6 ning jahkrat hkrum tawn da ai, Jinghpaw Wunpawng Hkalup Hpung Ginjaw (KBC) a amu madu Usa hte ningbaw magam lit hpe gun hpai lai wa sai, Rev. Dr Hkalam Samson hpe, myen hpyendap gaw, 2024 ning April 17 ya shani, htawng hta rim sharen da ai kawn, shalawt dat nna, April 18 ya shana hta shi a dum nta kaw nna, bai rim woi mat wa ai lam na chyelu ai.
“rim mat ai gaw, mana 2024 April shata 18 ya jahpawt daw, marang grai htu ai ten, 2:30 am daram kaw re, Nay Pyi Taw a ming (matsun) re ngu na rim mat wa ai,” nga nna, buga daju, hpung magam gun langai kawn tsun dan wa ai.
Ndai shiga hte seng nna, buga kata na ramma langai mung, tsun shateng wa sai rai tim, hpa majaw Sara kaba hpe bai rim woi mat wa ai lam hpe gaw, tup hkrak nchye lu shi ai nga tsun ai.
“mana hkyin 10 daram kaw bai woi mat ai, hpa na kun gaw rai nchye shi ai,” nga nna, buga masha langai tsun ai.
Sara Kaba Hkalam Samson hpe, myen hpyen asuya seng ang ai ni kawn, laiwa sai, 2022 ning December shata praw 5 ya shani, Mandalay muklum, nbungli pa kaw na, rim woi mat wa ai rai nga ai.
Sara Kaba hpe rim woi mat wa ai hpang, Myitkyina htawng hta, rim sharen da nna, 2023 ning April shata praw 7 ya shani, Myitkyina tara rung kawn, htawng dam 6 ning jahkrat dat ai rai nga ai.
Dr Hkalam Samson hpe tara upade pukma section 17(1), section 505 (a) section 52 (a) ni hte, la kap nna, rim ahkyak la ai hte, htawng dam jahkrat dat ai mung rai nga ai.
Sara Kaba Hkalam Samson gaw, KBC a amu madu magam lit hpe, 2010 kaw nna, 2018 ning du hkra gun hpai wa sai hte, KBC a ningbaw magam lit hpe gaw, 2018 kaw nna, 2022 ning du hkra gun hpai wa sai rai nga ai.
Laiwa sai 2019 ning July 17 ya shani hta, sara kaba Hkalam Samson gaw, mungkan shara shagu na, makam masham hpung ningbaw ni hte rau, Washington, DC kaw, American mungdan a Gumsan Magam Donald Trump Jr, hte, nta hpraw (White House) hta sa hkrum shaga wa sai rai nga ai.
Dai zawn hkrum shaga ai hte, Sara Kaba kawn, myen mung na, hkristan ni a masa lam ni hpe, American mungdan a Gumsan Magam wa hpe, tsun jahpra dan wa sai rai nga ai.
