Tsa-ka-tsa myen hpyen asuya gaw, Jinghpaw Mungdaw, Manmaw hte Nmawk mare na mung shawa ni hpe, April shata
23 ya shani kawn, laja lana, shagyip shagyeng lam ni galaw wa ai majaw, mung shawa ni jam jau nga ai lam, buga masha ni tsun ai.
“Ndai mung shawa, mare masha ni gaw (hpe) dai hpawt daw gaw, ndai Chyenan de na Hkanan de lai na nga yang, nlai shangun ai, lai na nga yang lai wu, (raitim) shan hte ni lai ai hte gaw, gap na nga tsun ai,” nga nna, mung shawa langai tsun wa ai.
Myen hpyen gumshem asuya hpyenla ni gaw, Nmawk mare kata, masha rim hkawm ai, dum nta, gat seng ni hkan jep san hkawm ai, arung arai ni kam mara la mat wa ya ai, hkawm sa hkawm wa lam ni hpe pat hkum wa ai hte, Manmaw muklum kata, nta shagu, masha jahpan jep san hkawm ai lam ni galaw nga ai re lam, buga masha ni tsun wa ai.
Nmawk muklum kata chyat rawng nga ai ni, hprawng pru wa lu na matu yak nga ai re hte, muklum shinggan de na, sa karum la na mung, yak nga ai re lam, chyelu ai.
“Hkanan de na Chyenan de yu na nga yang mung, nmai ai, Chyenan de na Manmaw de yu na nga yang gaw mai ai, dai majaw, an hte ni pyi naw, mana chyenan kaw yup na, lu pru wa ai rai nga,” nga, Nmawk muklum kawn, koi yen wa ai buga masha langai tsun ai.
Nmawk muklum kata na, mung shawa ni gaw, aten lu yang lu ai hku, masa hta hkan nna, hprawng pru lu wa na matu, shakut nga ai re hte, “nlu hprawng ai ni grai naw ngam nga ai,” nga nna, dai buga masha wa tsun ai.
“Ndai April shata 23, 24, 25 ndai masum ya lapran hta e, myen hpyen gumshem hku nna, muklum kata na, mung shawa ni a ntsa hta, shinggyim ahkaw ahkang ladu lai tawt lai nga ai hpe mu lu ai hku re,” nga Kachin Human Rights Watch (KHRW) a tsun shaga ahkang lu, shadang Jacob kawn, Ninghkawng shiga dap de tsun wa ai.
April shata 23 ya shani hta, myen hpyen gumshem gaw, nbungli hte bawm jahkrat bun ai majaw, mungshawa ni si hkala ai hte, dum nta ni hte nawku jawng ni, hten za mat ai lam ni nga re lam, shadang Jacob tsun ai.
April shata 24 hta, buga masha ni hpe rim jep ai lam ni nga ai hte April shata 25 ya shani hta gaw, dum nta ni, gat seng ni hpe jahten shaza ai, arung arai ni hpe, kam ai hku mya la mat wa ya ai lam ni nga ai nga nna, KHRW a tsun shaga ahkang lu ai wa kawn tsun wa ai.
“Dai ni April 26 ya shani kawn gaw, Nmawk mare shinggan pru mat ai ni hpe, mare kata de bai nshang shangun ai,” nga, buga masha ni hpe lakap let, shadang Jacob kawn tsun ai.
Ndai zawn galaw ai lam ni gaw, Mungkan kawn masat tawn ai, shinggyim ahkaw ahkang hte seng ai tara ni hpe ‘ladu shalai’ tawt lai taw ai re nga, KHRW kawn tsun ai.
Wunpawng Mungdan Shanglawt Hpyendap (KIA) hte pawng hpawm hpyen hpung ni gaw, Manmaw hte Nmawk muklum hte ni kahtep ai, myen hpyendap ni hpe, zing madu da sai hpang, myen hpyen asuya gaw, dai muklum kata ni hta, shimlam shaja wa ai re hte, ya na zawn, mung shawa ni hpe, laja lana, shagyip shagyeng ai lam ni galaw wa ai mung rai nga ai.
