Jinghpaw Mungdaw, Manje, Nmawk mare hte Manmaw mare makau hkan 2024 May shata praw 7 ya jahpawt jau, myen mung ten 5:00 am daram kaw nna, Wunpawng Mungdan Shanglawt Hpyendap (KIA) hte pawng hpawm hpyen mung ni gaw, myen gumshem hpyen dap ni hpe, htim gasat ai hpang, dai shara ni hta, majan laja lana byin nga ai re hpe chyelu ai.
“Manje gaw daihpawt kaw na hpang taw sai, laknak kaba hte shawng gap hkat nga ai,” nga buga masha langai, Ninghkawng shiga dap de tsun ai.
Manje mare kata na, pyada dap hte Nmawk mare kata na, pyada dap ni hpe, KIA hte pawng hpawm hpyen hpung ni kawn, padang dip zing la kau sai re hte, shani ka-ang 11:00 daram hta gaw, Manje mare grup yin hta, gap gasat ai lam ni, jahkring gan zim mat ai rai tim, myen hpyen dap gaw, hpyen nbungli hte, bawm jahkrat bun nna, gasat wa sai re lam, buga masha ni tsun ai.
“bawm nsen gaw, matut ngoi nga ai, mi yet nbung li hte 2 lang bat sa kapaw ya sai, ya sha mung, nbung li hte kalang mi bai wa kapaw sai, masin she di na zawn nga ai,” nga buga masha langai tsun ai.
Manje mare hta gaw, dap jung da ai, myen hpyendap nnga ai na sai raitim, ndai laman, Manje makau grup yin kaw nga ai, hkrat sum mat sai, hpyendap hkan na, myen asuya hpyenla ni gaw, Manje mare kaw, wa mahkawng taw ai re lam, buga masha ni tsun ai.
Manmaw hte Manje lapran, myen hpyen dap 2 naw ngam ai hte, dai shara ni hta, laja lana gasat hkat nga ai re lam, buga masha ni tsun ai.
Manmaw hte, Shwegu mare lapran kaw na, Sin Hkan mare kaw, dap jung shara la da ai, myen hpyen dap hpe, KIA hte pawng hpawm hpyen hpung ni, zing madu la sai hte, Nmawk mare kata de, rawt malan hpyen hpung ni, shang wa sai re lam na chyelu ai.
