Myitkyina hte Manmaw lam kaba ntsa kaw nga ai, Katsu Dabak Hka, mahkrai hpe 2024 May shata praw 8 shana hta, myen hpyen gumshen dap ni bawm kapaw jahten kau ai lam, shawnglam shiga kawn na chyelu ai.
Jinghpaw Mungdaw, Manje, Nmawk mare hte Manmaw mare makau hkan 2024 May shata praw 7 kaw nna Wunpawng Mungdan Shanglawt Hpyendap (KIA) hte pawng hpawm hpyen hpung ni gaw, myen gumshem hpyen dap ni hpe, htim gasat ai shang wa nna, myen hpyen asuya pyadap dap ni hpe, zing madu la wa sai rai nga ai.
Dai zawn, byin wa ai hpang, May shata praw 8 ya shana hta gaw, myen hpyen gumshen dap ni gaw, Myitkyina hte Manmaw madaw lam ntsa kaba na Katsu Dabak hka mahkrai hpe kapaw jahten kau wa ai mung rai nga ai.
May shata praw 9 ya shani hta gaw, myen hpyendap gaw, hpyen nbung li ni hte Nmawk mare hpe bawm jahkrat bun wa sai re hte, mare masha ni, yawng koi yen mat sai re majaw, masha hkala nba nnga ai raitim, dum nta ni wa hkru hten za nga ai re lam, na chyelu ai.
Myen hpyen gumshem hpyenla ni gaw, Manje mare kata hkan mung, shang shalau wa sai re hte, mu ai ni hpe mung, sinat hte gap bun ai majaw, hkala nba hkrum ai lam ni nga ai re hpe chyelu ai.
May shata praw kawn, masa lam tsang ra ai majaw, Maje mare na, koi yen mat ai, mung shawa ni, Mare kata bai nhtang wa ai kade nna shi ai re hte, myen hpyenla ni, shang shalau hpang wa ai majaw, mare kaw na kalang mi bai, hprawng yen ra ai lam, lawt pru wa ai, buga masha ni tsun ai.
May shata praw 9 ya shana maga ten hta, Myitkyina hte Waimaw muklum hpe matut tawn ai, Balaminhtin mahkrai kaw, shara tawn ai, Maina myen hpyen asuya dap hpe, rawt malan hpung ni, sa htim gasat dat ai hta, myen hpyen maga na, si hkala ai lam ni nga ai lam, na chyelu ai.
KIA hte Pawng Hpawm hpyen hpung ni gaw, Manmaw makau deng 6 daram tsan ai shara hta, myen hpyen hpung ni hte gasat gala byin nga ai re hpe mung, na chyelu ai.
