Putao de na yu hkrat wa ai, myen hpyen gumshem hpyen hpung ni gaw, Jinghpaw Mungdaw, Putao ginwang kata na, Sumpyi Yang mare hpe nat jahten nga ai re hte, mare masha 1000 jan gaw, nam kata de, hprawng koi yen nga ai lam, buga masha ni kawn, Ninghkawng shiga dap de tsun ai.
Nta kade daram nat jahten kau sai re hpe, tup hkrak nchye lu shi ai raitim, hpang jahtum mu kau da ai ten du hkra gaw, nlaw htum nta 4, nta 5 daram nat jahten kau ya sai re lam, koi yen nga ai, buga masha ni kawn tsun ai.
“2024 May18, bat 6 ya shani, Sumpyi Yang mare dum nta nkau wan nat (jahten kau) ya ai,” nga lahta na, buga masha kawn tsun ai.
Mare wan nat jahten ya ai, myen hpyen hpung ni a hpyen dap masat hti hkum hpe nchye lu ai raitim, Sumpra Bum hpe bai htim gasat na matu re ngu maram lu ai, Putao Muklum de na yu hkrat wa ai, hpyen hpung ni re lam, buga masha ni tsun ai.
Hting gaw 200 jan nga ai Sumpyi Yang mare gaw, Putao muklum kaw na, deng 40 daram tsan ai shara hta nga ai re hte, majan byin wa ai majaw, 2024 May shata 11 ya shani kaw nna, mare masha ni gaw, nam kata de, hprawng koi yen nga ai re lam, buga masha ni tsun ai.
“mare masha ni yawng, nam kata shara shagu de yen hkawm ai kaw na, jawm gahkyin la nna, shara mi hta camp gap nna, bai nga na matu shajin nga ga ai,” nga, lahta na buga masha wa tsun ai.
Sumpra Bum mare kaw dap jung shara lada nna, shata galu, ninghkap gasat nga ai, Myen Hpyen Dap Hka-La-Ya (46) hpe, 2024 ning May shata praw 5 ya jahpawt, Wunpawng Mungdan Shanglawt Hpyendap (KIA) hte pawng hpawm hpyen hpung ni kawn, tsep kawp zing madu la sai rai nga ai.
Ndai ten hta, Jinghpaw Mungdaw kata, Manje hte Nmawk mare na, mare masha ni yawng mung, buga mare kaw nna, shimlum ai shara hkan, hprawng koi yen nga ai re hte, myen hpyen dap kawn, masha nnga ai mare kata de, lanak kaba gap bang, hpyen nbung li ni hte, bawm jahkrat bun galaw nga ai majaw, buga masha ni a dum nta ni, gat seng ni, wan hkru hten za wa sai rai nga ai.
