Myitkyina daju, myen gumshem hpyendap Ma-Pa-Hka kawn, gap dat ai laknak kaba wa hkrat kapaw nna, Waimaw ginwang, Hkat Cho mare, lawk 1 na, mare masha 10 jan si hkala hkrum wa sai lam, na chyelu ai.
Laknak kaba wa hkrat kapaw ai Hkat Cho mare, lawk 1 na, Si-hkala hkrum ai ni hta, ma lahkawng mung lawm ai re hte, ndai mabyin gaw, 2024 May shata 20 shani byin ai re lam, buga masha ni kawn tsun ai.
Ma 2 hte, masha kaba 6 gaw, laknak kaba wa hkrat kapaw ai ten hta, asak si sum wa sai rai nna, kaga 10 jan hkala hkrum wa sai re lam, buga masha ni tsun wa sai raitim, si hkala hkrum wa sai, masha jahpan hpe gaw, tup hkrak nchye lu shi ai re.
Myen hpyen gumshem hpyen hpung ni gaw, Waimaw ginwang kata na, mare nkau hkan mung, nta ni hpe, wan nat jahten hkawm nga ai re lam, na chyelu ai.
Wunpawng Mungdan Shanglawt Hpyendap (KIA) hte pawng hpawm hpyen hpung ni kawn, Waimaw muklum makau grup yin myen hpyen dap ni hpe, zing madu la wa sai hpang, myen hpyen gumshem a Ma-Pa-Hka daju hpyendap kawn, laknak kaba hte, dai shara ni de, kam mara gap bun wa sai mung, rai nga ai.
