Shawng ningnan lang na, mungkan madang Kachin Golf ginsup shingjawng poi hpe, American mungdan Hawaii zinlawng hta, 2024 June shata praw 7 ya kaw nna, 9 ya shani du hkra angwi apyaw hte, galaw la lu sai lam, chyelu ai.
Ndai Golf ginsup shingjawng poi lamang hpe, Kachin Golf Association (KGA) kawn, woi awn zinlum ai hte, galaw ai rai nna, shingjawng poi lamang hpe “Kachin Open Golf Tournament” ngu mying jaw da ai re lam chyelu ai.
Ndai lamang hpe, matut nna, 2 ning hta kalang lu galaw na matu myit mada tawn ai hte, matut bawngban jahkrup nga ai rai nna, “Htai mungdan Chiang Mai de rai wa na kun, Myenmung de rai wa na kun, mungkan jut shara shagu hkan lu galaw mat wa na matu, myit mada da ai” nga, KGA a ningbaw rai nga ai, Slg. Myitung Gawng Mai kawn, Ninghkawng shiga dap hte san htai lamang hta tsun ai.
KGA kawn, Myenmung, Thailand, Australia, Malaysia, Singapore, Vietnam, Miwa mung, Canada hte USA mungdan hkan shanu nga ai, Kachin myusha ni yawng, shanglawm shingjawng na matu, yaw shada let, woi awn zinlum wa sai raitim, American mungdan de shanglu na matu, visa nlu ai, mayak manghkang ni a majaw, USA hte Canada mungdan hta shanu nga ai, Kachin myu sha ni sha sa du shanglawm lu ai re lam chyelu ai.
Ndai ginsup lamang galaw ai a yawng shada lam madung langai gaw, tinang a “Wunpawng myusha ni hpe zinlum ai lam hta, jut shara mi kaw na sha pyi shang lawm lu na matu, myit mada ai,” re lam, Slg. Myitung Gawng Mai kawn tsun ai.
Ginsup shingjawng poi lamang byin tai wa na matu, American mungdan daju, Kachin myu sha ni a hpaga company nkau hte, Myitsu salang ni law law, garum madi shadaw ya ai re hte, lamang hta sadu shang lawm na matu, nawku hpung n-ginhka ai sha, Kachin myu sha ni yawng hpe, saw shaga ai re lam, KGA ningbaw wa kawn tsun ai.
KGA kawn, Myenmung kata na, tinang a myusha ni shanglawm shingjawng lu na matu, American asuya a seng ang ai Embassy rung ni de tsun shaga wa sai raitim, awng dang ai lam nnga ai majaw, buga kata na ginsup ninghkring ni, sadu shingjawng lu ai lam, nnga mat ai re lam, KGA ningbaw kawn tsun ai.
Ndai shingjawng poi lamang hta, Maui, Hawaii, USA hte Canada mungdan kaw na, ginsup ninghkring yawng 18 tup sa du shanglawm shingjawng wa sai re hte, nambat 1 kumhpa hpe San Awng Tsam, nambat 2 kumhpa hpe Khinsan Dingra hte nambat 3 kumhpa hpe gaw, Mung Gyit Htingnan ni, lu la wa sai re lam chyelu ai.
Ginsup shingjawng poi a, (the best player) ningtawn dik ginsup ninghkring kumhpa hpe gaw, Khinsan Dingra kawn, Longest drive- nearest to the pin-1, Khinsan Dingra 2, Jadanli Bawmwang 3, San Awng Tsam 4, Mung Gyit Htingnan ni shagrau hkrum wa sai re lam chyelu ai.
Golf ginsup ai lamang hta, ginsup ai ni kawn, birdie langai lu gayet shagu, buga kata na, hpyen yen tsin yam ni hpe, dollar 50 garum mat na matu, lamang mung, shalawm da ai re hte, myu sha lam hpe, ma kaji ni yu sharin la na matu, shanglawm ginsup ai ni kawn, myusha dawnghkawn palawng hpun nna, ginsup wa sai re lam, KGA ningbaw wa kawn tsun ai.
Golf ginsup ai tinang a myusha ni, professional madang de lahkam wa lu nna, mungkan madang rai nga ai, PGA de shanglawm shingjawng lu wa na matu mung, yaw shada tawn ai re lam, Slg. Myitung Gawng Mai kawn tsun ai.
