Mare masha ni, nam de hprawng koi yen mat ai, Sumpyi Yang mare hta, Putao de na yu hkrat wa ai, myen hpyen hpung n-gun 200 daram gaw, dai ni aten du hkra, shara shang la tawn ai lam, buga masha ni tsun ai.
Laiwa sai, May shata ka-ang daram hta, Putao de na, yu hkrat wa ai, myen hpyen hpung ni a majaw, mare masha ni gaw, nam kata de, hprawng koi yen mat ai re hte, dai myen hpyen hpung ni gaw, Sumpyi Yang mare kata na, dum nta nkau hpe mung, wan nat jahten kau ya wa sai rai nga ai.
“Sumpyi Yang mare masha ni gaw, Sumpra Bum na, nau ntsan ai shara kaw, hpyen koi yen taw nga ma ai, masha gaw, hkying mi jan ai, mare de gaw, kadai nnga ai, myen ni nga taw nga ma ai,” nga buga masha langai tsun ai.
Hpyen n-gun 200 daram nga ai, dai myen hpyen hpung ni hpe, Putao de nbungli hte htaw sa da ai rai nna, dai hpyen hpung gaw, Sumpyi Yang mare de yu hkrat wa ai re lam, na chyelu ai nga, buga masha langai tsun ai.
Nsi hka a Sumpyi Yang mare nga ai, hkran maga de gaw, myen ni nga nna, Shanglawt hpyen hpung ni gaw, hka a kaga hkran de shara la tawn ai re hte, yu sin hkat taw nga ai re lam, buga masha ni kawn tsun ai.
“Galoi ngoi wa na kun gaw, nchye ai, Sumpyi Yang mare masha ni gaw, yen da ya ai ga rai nga ai,” nga dai buga masha wa tsun ai.
Sumpra Bum mare kaw dap jung shara la da ai, Myen Hpyen Dap Hka-La-Ya (46) hpe, 2024 ning May shata praw 5 ya jahpawt, Wunpawng Mungdan Shanglawt Hpyendap (KIA) hte pawng hpawm hpyen hpung ni kawn, tsep kawp zing kau ngut ai hpang, mare hpe uphkang hpang wa sai re hte, hpyen koi yen mat ai, Sumpra Bum mare masha ni mung, mare de bai nhtang wa sai re lam, na chyelu ai.
“Sumpra Bum kaw gaw, bat mi rai wa sai, anhte mare buga masha ni bai nhtang wa nna, tinang dum nta tinang wa shanu nga sai,” nga mare masha langai tsun ai.
Shanglawt ni uphkang ai gaw, hpaji lam, uphkang rung, hkam kaja lam ndai masum hpe shagreng nna, mung shawa ni hpe, woi awn taw nga ai re hte, mare masha ni mung, tinang a dum nta kaw nga, tinang a yi galaw nna, nga nga sai re lam, buga masha wa kawn tsun ai.
Ndai ten hta, Jinghpaw Mungdaw kata, Manje, Nmawk hte Waimaw mare hkan na, mare masha ni yawng mung, buga mare kaw nna, shimlum ai shara hkan, hprawng koi yen nga ai re hte, myen hpyen dap kawn, masha nnga ai mare kata de, lanak kaba gap bang, hpyen nbung li ni hte, bawm jahkrat bun ai lam ni, galaw nga ai majaw, buga masha ni a dum nta ni, gat seng ni, wan hkru hten za wa sai mung rai nga ai.
