2024 ning November shata 11 ya shana yup tung hta, Hpakan ginwang, Maw Si Za mare makau kaw nga ai, gabum gyi ru hkrat wa nna, lung seng tam ai masha nlaw htum 40 daram mat taw ai lam, buga masha ni tsun ai.
Lung Seng htu ai kaw na, ga ni ru sumpum da ai, gabum gaw, November 11 ya shana hkying 12 daram hta, gyi ru wa nna, gabum kaw, lung seng tam nga ai ni, nlaw htum 40 daram lawm mat ai re lam, buga masha ni tsun ai, “Yemase tam ai ni 40 daram hpe tam nmu shi ai,” nga dai buga masha wa kawn tsun ai.
Hpakan ginra hta, ya na zawn, gabum gyi ru hkrat wa nna, lung seng tam ai ni, bungli galaw ai ni, law law, si hkala hkrum ai lam ni, jahkring hkring byin nga ai rai tim, karum jaw ai lam ni, mat nga ai ni hpe tam sagawn ai lam ni, atsawm nlu galaw ai re lam chyelu ai.
Ndai laman Hpakan ginra hta, myen hpyendap a hpyen hpung ni hte, KIA woi awn ai, pawng hpawm hpyen hpung ni a lapran majan matut manoi byin nga ai mung rai nga ai.
