Wunpawng Mungdan Shanglawt Hpung (KIO) gaw, Myen mung rapdaw salang dingsa Zahkung Ting Ying woi awn ai NDA-K a Masat (1) laksan ginra hpe, shaprai- dawm kau sai lam, 2024 ning November shata 28 shani hta ndau sha na dat sai re.
Kachin Myusha ni hpe myit garan sha ngun ai hte myit hkrum rap ra ai lam hpe hten bya sha ngun nna, Myen hpyen asuya kawn, shan hte a ahkang a ya ( arawng a ya) grin nga lu na matu yaw sha da let gyin shalat, hpaw shabawn tawn ai masat (1) laksan ginra hpe shaprai kau sai lam, ndau shabra laika hta tsun tawn ai re hte “ ya kaw na masat (1) laksan ginra n-nga sai” nga KIO kaw na ndau sha na dat sai re.
Masat (1) laksan ginra na mungmasha ni a sut masa lam ni hte ginra rawt jat kalu kaba wa na matu madung tawn let up hkang sa mat wa na re lam KIO kawn tsun wa sai rai nna, NDA-K uphkang ai n pu hta nga lai wa sai, ginra kata arang bang nna, hpaga galaw ai ni hte ginra kata kaw na mung shawa ni KIO hte ta gyin dun let rau sha jawm galaw sa mat wa na matu mung, ndau shana ai laika hta, tsun shadut wa sai re.
Myen hpyen dap n pu taw ai, Jarit sin dap (နယ်ခြားစောင့်တပ်) hku nna, nga lai wa sai, NDK-A laknak lang hpung kawn, up hkang ai Masat (1) Laksan ginra kata hta na, hpang jahtum ngam ai Kanpaiti mare hpe KIA hte pawng hpawm hpyen hpung ni kawn, 2024 November shata 20 ya sha ni hta tsep kawp zing madu la ngut ai bat mi na ai hpang KIO kawn, ya na zawn ndau shabra laika hpe shapraw dat ai mung rai nga ai.
KIA hte pawng hpawm hpyen hpung ni gaw, NDA-K kawn up hkang madu tawn ai Masat (1) laksan ginra kata na mare ni hte hpyen dap ni hpe Miwa asuya kawn dip n-gun jaw nga ai a lapran, September shata htum wa maga kaw nna, langai hpang langai, htim gasat zing madu wa ai mung rai nga ai.
KIA kawn masat (1) laksan ginra hta majang baw htim gasat ai lam ni matut manoi galaw wa ai hpang, Miwa asuya gaw dam jaw ai hku nna, lamuga jarit pru shang shara ni yawng hpe pat kau ya ai rai nna, ya ten du hkra bai hpaw ya ai lam n-nga shi ai re.
NDA-K laknak lang hpung hpe, KIO magam gun dingsa ni rai nga ai, Zahkung Ting Ying, Layawk Ze Lum hte Ying Ze Lum ni kaw na 1989 hta hpaw shabawn dat ai rai n-na, dai shaning hta sha Myen Hpyen Asuya hte gap hkat jahkring myit hkrum ta masat galaw ai re hte 2009 ning hta Myen Hpyendap npu taw ai, Lamuga Jarit sin dap (BGF) hpung ngu nna, hpaw shabawn dat ai mung rai nga ai.
NDA-K hpyen hpung a ningbaw rai nga ai Zahkung Ting Ying gaw lai wa sai 1968 ning hta KIA kaw na ga garan pru mat wa ai hte, Myen Communist Party de shang nna, Myen Communist Party 101 hpyen hpung hpe mung hpaw wa sai rai nga ai.
Zahkung Ting Ying gaw 2015 ning na, Myen mung a ralata poi hta shang lawm shing jawng wa sai re hte, ralata poi dang ai raitim, ralata poi a hkan nang hkan sa ra ai, tara ni hpe tawt lai ai a majaw 2016 ning hta Rapdaw Salang ahkang aya kawn, dawm kau ya ai hkrum wa sai mung rai nga ai.
