Wunpawng Mungdan Shanglawt Hpyendap (KIA) hte pawng hpawm hpyen hpung ni gaw, 2024 December shata praw 4 ya jahpawt jau kawn, htim gasat shang hpang wa sai, Manmaw muklum hpe, ya ten, tsalam shadang 80% daram zing madu da sai lam na chyelu ai.
“Ya ten hta gaw, tsalam shadang 80% daram gaw, lu zing sana re, mare kata de na, amyawk dap (laknak kaba dap) sha nga sai nga na lu ai,” nga Mammaw muklum kawn, ndai laman hpyen koi yen wa ai, buga masha langai tsun ai.
“Re ai zing ai lam gaw yawng ngu na daram rai wa sai” nga na Manmaw muklum kata hta nga ai kaga mare masha langai kawn mung tsun ai.
Ya ten Mammaw muklum kata na, mung shawa ni malawng maga, hprawng yen mat sai raitim, muklum kata chyat rawng nga ai ni mung, grai naw nga ai re lam, mare kata kaw na, hprawng yen wa ai buga masha wa tsun ai.
“An hte hprawng wa ai shaloi gaw, lahkawng ya daram, lam hpaw ya ai ten re, dai hpang bai pat kau ai,” nga myen hpyen hpung ni kawn, muklum kaw na, pru shang shara ni hpe, pat hkum da ai hte seng nna, buga masha wa kawn sang lang dan ai.
KIA hte pawng hpawm hpyen hpung ni gaw, 2024 March shata praw 7 ya shani kaw nna, myen hpyen asuya uphkang ai ginra ni hpe, htim gasat zing madu la wa ai gaw, ya ten hta, Mali Hka a sin praw hkran maga na, mare gaba nlaw htum18 daram hpe zing madu la ngut sai rai nna, mare kaba 3 daram naw ngam ai re lam chyelu ai.
Mali hka a sinpraw ma ga hta KIA ni nlu zing shi ai, Manmaw, Shwegu hte Waimaw mare kaba ni naw ngam ai re lam chyelu ai.
Shana ten hta hpyen gasat nbungli pyen ai nsen ni hte bawm kapaw ai nsen ni matut manoi ngoi gara ding yang re nga “Bawm nsen ni ngoi ai wa an hte Laiza hkran maga de pyi majoi she ngoi gara wa ai, shana ten hkan mung naw matut manoi rai nga ai” nga Laiza kaw nga ai KIO magam gun langai kawn tsun ai.
Laiza muklum de gaw, hpyen yen nau ndu wa ai rai tim, Manmaw de na machyi masha ni gaw ding yang du shang wa ai re lam, na chye lu ai.
Majan laja lana byin nga ai ten hta Miwa asuya kawn, saw shaga ai a majaw, Wunpawng Mungdan Shanglawt Hpung (KIO) a ningbaw kaba Dukaba Nban La woi awn ai, KIO a lahta tsang salang ni lam ai hpung gaw, Miwa asuya a lahta tsang salang ni hte, hkrum shaga bawngban nga ai re.
Zuphpawg hta hpabaw lam ni hpe bawngban jahkrup nga ai hte seng nna gaw, ya ten hta tup hkrak nchye lu shi ai rai nga ai.
Manmaw muklum kata majan laja lana matut byin nga ai re hte, kawng lam nmai sa mat ai, myen hpyendap gaw, nbungli hte, shan hte a hpyen hpung ni hpe garum ningtum ni, jahkrat ya nga ai zawn, mare kata bawm jahkrat bun nga ai lam chyelu ai.
