Jinghpaw mung hte Miwa mung a lapran lamu ga jarit ni bai hpaw na hte seng nna, Miwa asuya hte Wunpawng Mungdan Shanglawt Hpung (KIO) a lapran bawng ban jahkrup myit hkrum ai hte, 2024 December shata 13 ya shani kawn hpang nna, bai hpaw hpang wa sai raitim, gunrai ni yawng htaw shalai nmai shi ai lam chyelu ai.
Mungdan lahkawng maga na, lamu ga Jarik bai hpaw dat ai hpang, malu masha htaw ai mawdaw gaba ni gaw sha woi na zawn, pru shang galaw wa sai lam chye lu ai. Rai tim, “ Dai lu sha madaw ni hta lai na , kaga ga baw hte seng na gaw pru shang ai lam nau n-nga shi ai” nga na Laiza hta shanu nga ai KIO magam gun langai tsun ai.
Gunrai htaw shalai ai hta, shawe na zawn yawng hpe wanglu wanglang htaw shalai lu ai lam gaw, nnga shi ai re hpe chyelu ai. “hpaw gaw hpaw sai raitim, rai ni shalai ai lam gaw, nmu shi ai” nga, laiza buga masha langai kawn tsun ai.
“Miwa hkran na ma hpaw sai, anhte hkran maga na ma hpaw sai, raitim pru shang ai lam gaw, grai wa n-galaw shi ma ai,” nga lamu ga jarit kaw nga ai, buga masha langai tsun ai. Laiza maga de na, lam ni hpe mung, bai gram lajang, byeng taw nga ai hpe mung na chyelu ai.
Loije muklum kaw na, jarit pru shang shara hpe mung, December 16 ya shani kaw na, bai hpaw dat sai rai nga ai. Jaksau zawn re ai, gunrai ni hpe htaw shalai ai lam, nmu shi ai hte, masha pru shang ai lam ni hpe mung, matut nna pat hkum tawn ai re lam, na chyelu ai.
Lamuga jarit sha ra hkan na Myen Asuya hte seng ai, hpa rai mung n-nga hkra jasan kau sai re lam hpe mung na chye lu ai.
2024 ning November shata 28 ya sha ni, Zahkung Ting Ying woi awn ai NDAK jarit sin dap a Laksan Ginra masat (1) hpe zing nna, Laksan Ginra Masat (1) ngu ai hpe shaprai kau sai lam, KIO kawn ndau shana dat sai re hte, Miwa Asuya kawn mung, Jinghpaw mung hte Miwa mung lapran na, pru shang shara ni yawng hpe pat kau ai mung rai nga ai.
Wunpawng Mungdan Shanglawt Hpyendap (KIA) hte pawng hpawm hpyen hpung ni kawn, Manmaw muklum hpe htim gasat hpang wa ai ten, Miwa asuya kawn, saw shaga ai a majaw, KIO a Ningbaw Kaba Dukaba Nban La woi awn ai, KIO a lahta tsang salang ni lawm ai hpung gaw, Miwa asuya a lahta tsang salang ni hte, hkrum shaga bawngban lai wa sai hpang, December shata 13 ya sha ni kawn, Lamu ga Jarik ni bai hpaw hpang wa ai mung rai nga ai.
Zuphpawg hta bawngban jahkrup ai lam ni hpe gaw, tup hkrak nchyelu ai raitim, hkamja lam, hpaji lam, hpaga lam hte seng nna, bawngban jahkrup wa sai zawn, Miwa lamu ga jarit mayan hkan majan byin ai lam hpe, koi yen na hte, myen hpyen dap hpe gasat ai lam ni, jahkring na matu, Miwa asuya salang ni kawn, dip n-gun jaw, tsun shadut wa sai re lam, na chyelu ai.
