Jinghpaw mungdaw a hkring mang daju dingsa hte, NLD pati a rapdaw dat kasa mung rai nga ai, Dr. Hkyet Awng gaw, 77 lang na, myen mung shanglawt lu ai masat masa nhtoi rai nga ai, January praw 4 ya shani, shalawt dat ya ai ahkang jaw ai shani hta, htawng kata rim sharen da hkrum ai kawn, bai lawt pru wa sai lam chyelu ai.
Dr. Hkyet Awng hpe 2021 ning February shata praw 1 ya shani, myen mung na, daru magam hpe Myen Hpyendap kawn, maja zing madu la ai shani kawn, Pukma ( ပုဒ်မ) 55, kaga amu 4 hte, mayun kumhpa sha ai ngu nna, mara shagun da ai Pukma ni hte rim akyak la da ai mung rai nga ai.
Dr. Hkyet Awng gaw, myen mungdan a 2015 ning ra lata poi hta NLD pati a dat kasa langai hku nna, Jinghpaw Mungdaw rapdaw a matu ra lata poi hta shang shing jawng nna, dang ai hpang, 2016 ning kaw nna, 2021 ning February shata praw 1 ya shani du hkra, Jinghpaw Mungdaw a hkring mang daju magam lit hpe gun hpai wa sai mung rai nga ai.
Myen Mung ယာယီသမ္မ a ndau shana ai masat hti hkum (1/2025) hte maren, seng ang ai rapdaw hta na htawng masha ni hpe masat da ai tara kata, htuk manu ai (ကိုက်ညီ) htawng masha ni hpe shalawt ai lam (လွတ်ငြိမ်းချမ်းသာခွင့်) jaw ai re hpe ndau lai ka pa hta ka da ai re.
Myen mung shanglawt lu ai masat nhtoi shani hta, htawng kata na, shalawt dat ya ai ahkang hte, lawt pru wa ai bawng masha ni yawng, 5864 tup rai nna, dai kaw, maigan masha 180 lawm ai re hte, shaning galu htawng dam jahkrat hkrum da hkrum ai masha 144 hpe mung, htawng dam 15 ning de shayawm kau ya ai lam chyelu ai.
Jinghpaw mungdaw Myitkyina htawng kaw na, masha 53 lawt pru wa ai hta, num 2 lawm ai lam chyelu ai.
Ndai zawn, myen mung shanglawt lu ai shani masat masa hku nna, (လွတ်ငြိမ်းချမ်းသာခွင့်) hte lawt pru wa ai ni hta nlawm ai bawng masha ni gaw, kani nanghpam mara hte htawng hkrat nga ai ni, roi rip ai mara (မုဒိမ်းမှု) hte htawng hkrat nga ai ni, masha sat ai mara ( လူသတ်မှု), damya amu (ဓားပြမှု) ni hte htawng hkrat nga ai ni nlawm ai re lam chyelu ai.
