Dai ni 2025 ning January shata 10 ya nhtoi aten e, 77 lang na Jinghpaw Mungdaw masat nhtoi lamang hpe Myitkyina hta Manau nau ai lam, Manau hpe 2025 ning January shata 9 ya shani kawn Jinghpaw Mungdaw masat nhtoi hpe hkap tau ai ku nna Manau hpang ai lam chye lu ai. Manau nau ai Manau hpan ni gaw Padang Manau, Sut Manau hte Myit hkrum Manau ni rai nga ai. Manau hpe Jinghpaw Mundaw asuya uphkang rung hta galaw ai lam chye lu ai.
Manau hta shang lawm ai ni gaw Myen Asuya masha ni sha rai nga ai lam chye lu ai. Manau poi hta sa du shang lawm ai ni malawng gaw Myen hpyen gumshem amu gun masha ni hkrai sha re ai majaw, shim lam hpe laja lana jahkrat da ai lam chye lu ai. “Traffic lights shagu hkan e mung Myen hpyen la ni hte balik ni shim lam la nga ai” nga nna Myitkyina hta nga ai ramma langai mi kaw nna tsun shana wa ai. Ndai lamang hta masat 2 hkring mang daju Tin Maung Tun, Myen hpyen asuya mung up council malawm rai nga ai D Doi Bu hte Asuya magam gun ni shang lawm ai lam na chye lu ai.
Manmaw mare hpe KIO/KIA hte PDF dap hpawn ni zing la lu ai hpang gaw, Myitkyina hta majan byin wa na hpe hkrit tsang nga ai nga nna, Myitkyina mare masha ni kaw nna na chye lu ai. Myitkyina hta ya ten shana hkan, shawoi na hta grau nna, Mung shawa ni shing gan de pru hkawm sa ai lam grai yawm mat wa sai, shim lum lam a matu hkrit tsang ra ai majaw rai nga ai lam na chye lu ai. “Lagut damya law wa ai, Myen hpyen la ni hpyen lahkawn rim la ai lam ni a majaw, mung shawa masha ni shing gan pi n-gwi le wa sai” nga nna, Myitkyina hta nga ai ramma ni kawn chye lu ai. Ramma nga ai nta, ramma lu ai Kanu Kawa ni mung tinang a kashu kasha ni hpe grai myit tsang ra ai ten ladaw rai nga ai. Myikyina hta masha mat ai lam ni mung grai law wa ai hte Motorcycle adawt ai lam ni grai jat law wa ai hpe Myitkyina mare masha ni kawn na chye lu ai re.
