Manmaw mare kaba na, nbungli pa hpe Wunpawng Mungdan Shanglawt Hpyen Dap (KIA) hte pawng hpawm hpyen hpung ni, htim gasat zing madu la ngut ai hpang mare kata de, Drone hte Nbungli hpan (2) hte shani shagu ngu na daram, bawm sa jahkrak bun nga ai lam, na chyelu ai.
Bawm jahkrat bun ai aten gaw, shana ten hkying 12:00 pm aten daram hte, jahpawt gaw, hkying 3:00 am aten daram hkan dingyang bawm sa jahkrat bun nga ai re lam chye lu ai.
KIA hte pawng hpawm hpyen hpung ni gaw, myen hpyen dap a tsa-ka-tsa 21 (စကခ-၂၁) hpe tsep kawp lu zing la na matu, matut nna htim gasat nga ai re hte, hka-la-ya 236 (ခလရ -၂၃၆ ) hte tsa-la-tsa 2 ( စလစ – ၂) ni hpe gaw matut nna, gasat jasan nga ai re lam, na chyelu ai.
Manje Muklum makau kaw, dap jung shara jahkrat tawn ai, myen hpyen dap ni hpe, 2025 ning January shata praw 8 ya shani zing madu ngut ai hpang, Manje mare hpe, KIA hte pawng hpawm hpyen hpung ni kawn, tsep kawn, zing madu lu da sai lam, Laiza daju KIO magam gun langai kawn tsun ai.
Manje hte Manmaw mare hkan, KIA ni hku na 2024 ning December shata praw 4 ya kawn kalang mi bai, majan baw htim gasat hpang wa ai hta, 2025 January shata praw 8 ya sha ni hta gaw Manje hpe, tsep kawm zing madu lu ai mung rai nga ai.
Matut nna, Mannaw kata ngam nga ai, myen hpyen dap ni hpe, laja lana htim gasat nga ai hta, mare ka ta na Myen hpyen ni a hpyen dap malawng maga hpe mung, lu zing la sai mung rai nga ai.
“Majan baw taw ai masa lam gaw gumshem myen hpyen hpe htim shagrawt ai masa rai nna, awm dawm shanglawt nna shadip jahpang ahkang aya lu la hkra pandung tawn gasat taw nga ai masa rai nga ai. Ya ten na hpyen manjan gaw Manmaw mare kaw nan rai nga ai” nga Manmaw mare na, mung masha langai tsun ai.
Mung shawa ni hpyen koi yen mat ai ten, shan hte a dum nta ni hkan na arung arai ni hpe lagu la hkawm nga ai lagut ni hpe gaw KIA ni hku na rim ahkyat la ai lam ni, galaw nga ai hpe mu lu ai nga, lahta la, buga masha kawn tsun ai.
“Manmaw muklum hpe 2025 ning January shata ka-ang hkup hkan yawng zing madu lu wa na re ngu mu mada lu ai” nga shi a ning mu hpe mung, tsun dan wa sai re.
“Mungshawa ni a dum nta ni hten za mat ai lam law law nga sai, Mungshawa nkau gaw arung arai ni htaw ginlen la yak ai majaw hkum kaman yen mat ai mung law law nga ai. Nkau gaw Manmaw hta sha nga nga ai re, rai tim law malawng gaw hprawng yen mat masai” nga, Manmaw mare masha rai n-na ya ten Laiza hta shanu nga ai saranum langai kawn tsun ai.
Hprawng yen taw ai ni hta mung, mayak a myu myu nga rai nna, tsi mawan, malu masha, nga na sha ra hte ja gum hpraw ni yak hkak nga ai lam na chye lu ai.
KIA hte pawng hpawm hpyen hpung ni kawn, Mali hka a sin praw hkran ma ga na mare yawng ngu na daram mare gaba (18) hpe zing madu da sai re hte, Manje mare hpe mung kahtap nna, lu zing la sai hpang, Manmaw hpe lu zing la na matu, shakut nga ai mung rai nga ai.
