Jinghpaw mungdaw, mare daju Myitkyina muklum hta myihprap wan nlu wa ai majaw, mung masha ni grau na yak hkak wa nga ai lam na chyelu ai.
Jinghpaw mung hta lai wa sai aten ni hta gaw, myihprap wan hpe lani mi hkyinghkum 15 daram lu ai raitim, ya ten hta gaw wan lu lang ai lam grau yawm wa ai majaw Myitkyina mare masha ni grau nna jamjau wa nga ai re lam chyelu ai.
2025 ning, January shata 14 ya shani hta, Buga myihprap wan dap company a ndau laika hte maren, lani mi hta wan hkyinghkum 8 sha lu lang na ahkang a majaw, lawk sha gu hpe A-hpung, B-hpung B, C-Hpung hku na lawk hte lawk wan jaw taw ai re lam na chye lu ai.
“Wan la ra taw ai majaw shat pyi atsawm n-lu shadu sha lu ai” nga Myitkyina mare masha langai tsun ai.
“Shawoi pyi wan hkying hkum 8 tup naw sa ai, ya gaw hkying hkum 6 daram sha sa ai” nga nna kaga mare masha langai mung tsun wa ai.
Myitkyina mare hta, gashun gashe galaw ai lam ni, shawoi na hta grau law wa nga ai majaw shani a ten hkan pyi shimlum lam n-nga taw sai hpe na chye lu ai.
Myitkyina mare kata hta gunrai manu hte jak sau manu gaw loi mi yawm wa ai lam na chye lu ai “ shawoi na ten hta jak sau manu gaw, loi mi gaw yawm wa ai, shawoi gaw 10,000, ya gaw 9000 ram rai wa ai” nga na mare masha langai kawn tsun ai.
Myitkyina mare masha ni gaw hkrit tsang ra ai lam ni hpe malap da let hkawm sa shakut shaja sha nga taw ai re hte, ramma ni a matu mung shimlum lam grau nna ra kadawn wa nga ai re hte, majan byin wa na hpe mung hkrit tsang ra taw nga ai re lam na chye lu ai.
Myitkyina Bala Min Htin mahkrai hpe lai na hkawm sa ra taw nga ai Waimaw ginwang kata na mare masha ni pru shang galaw nga ai shara ni hpe, hkyinghkum 1 hta kalang ram sha hpaw ya taw ai majaw mare masha ni hkawm sa hkawm wa yak nga ai hte, Waimaw ginwang, Hkatcho (ခတ်ချို) mare makau na Mukloi (မုတိလွဲ) mare kata na pru shang shara hpe grau nna laja lana pat shingdan tawn ai lam na chyelu ai.
