Wunpawng Mungdan Shanglawt Hpyen Dap (KIA) hte pawng hpawm hpyen hpung ni gaw, Manmaw muklum hpe 2024 ning, December shata kaw na majan baw htim gasat hpang wa ai hpang, ya dai ni du hkra majan laja lana naw byin nga ai re hte, myen hpyen dap law law hpe lu zing madu da sai mung rai nga ai.
Manmaw muklum kata hta, Myen Hpyen Dap hte seng ai dap 10 jan nga ai kaw na, dap gaba gaw 5 ram nga ai lam chye lu ai.
KIA hpyen hpung ni kawn, Manmaw muklung kata na, lu zing madu tawn sai dap ni gaw, Nbung li pa hpe 2025 ning January shata 25 ya shani hta lu zing madu la n-na, tsa-ya-hpa (kai chyan dap) hpe 2025 ning January shata 27 ya shani, Laknak gaba dap masat 6007 hpe 2025 ning January shata 26 ya shani hte Hpri Gang Dap Dung masat 7006 hpe 2025 ning January shata 25 ya shani 3:45 pm ten Laknak gaba dap masat 366 hpe 2025 ning February shata praw 2 ya shani, hta lu zing madu tawn sai re lam na chyelu ai.
Ndai ten hta, ngam nga ai hpyen dap ni hpe, htim gasat nga ding yang rai nga ai hte, tsa-ka-hka (21) hpyen dap kaba hta majan laja lana byin nga ai re lam, na chyelu ai.
Manmaw kata majan laja lana byin nga ai aten , Myen hpyen dap ni kawn January shata 24 hte 25 ya shani KIO ginjaw Laiza muklung kata hte Laiza muklung kata na, Lai Sin bum mare (hpyen dap dingsa) hta Suicide Drone hte wa jahkrat gasat ai lam galaw wa sai hte, dai zawn galaw ai gaw, myen hpyen dap kawn, Manmaw majan hta hpyen dap ni hpe tat sum kau ai majaw, matai htang ai hku nna, gasat ai re lam, ginra masha ni kawn, sawn maram tawn ai re.
