2025 ning February shata praw 5 ya shani, Wunpawng Mungdan Shanglawt Hpyen Dap (KIA) a Rawt Malang ladu hkrum ai (64) lamang hte rau OKFA (Overseas Kachin Foreign Affairs) camp a (50) ning hpring masat masa manau nau ai lamang hpe, Htai mungdan, Htam Ngawp Bum hta, galaw wa sai re.
Lamang hta Manau nau ai lamang, Labau ni hpe ginleng dan ai lamang, Wunpawng Mungdan Shanglawt Hpung (KIO) ginjaw komiti de na shagun dat ai mungga hpe hti shalai dan ai lamang, Wunpawng Mungdan lawt lu na matu Akyu hpyi ai lamang ni hte rau masha 300 jan 400 hkawt shang lawm nna, galaw wa sai re.
1965 ning hta Ningbaw Kaba, Dukaba G.O.C Lahtaw Zau Seng woi awn ai KIO/KIA ginjaw a maigan kyit hkai masing a matu Htai mungdan Htam Ngawp Bum de du wa na OKFA camp hpe hpaw hpang wa sai re hte, 1975 February shata praw 5 ya shani hta VCS Dukaba Lahtaw Zau Tu hte Ninggawn Amu madu salang kaba Pungshwi Zau Seng yan mung OKFA camp de du nga ai ten, mare masha ni , htingbu rawt malan hpung ni hte Rawt Malan Nhtoi lamang Manau nau let galaw lai wa sai re lam chyelu ai.
“Lai wa sai 1975 ning praw 5 hta Dukaba G.O.C (Lahtaw Zau Seng) hpung ni kawn Manau nau ai lam galaw hpang lai wa sai, htung hking hku Manau hta Nau Gup lawm ra ai majaw, dai ni 2025 ning hta 50 ning hpring masat hta Nau Gup hku na bai shangut shakyet ai re,” nga Manau hte seng na seng ang ai ni kawn tsun ai.
Poi shabying shatai komiti ningbaw mung rai nna, Htai mungdan daju, Laili Laika hte Htung Hkying Hpung a ningbaw hku na woi awn zin lum galaw nga ai Slg. Gauri Jawa Zau kawn tsun ai hta, lamang hpe ginwan hkan na mare Salang ni, namkawn dap a ningbaw ni, hpyen du ni hte makau mayan hkan nga ai ni hpe ahkang hpyi, G.O.C Lahtaw Zau Seng a dum nta masha ni hte moi na hpyenla usa ni, moi na miwa hpyen dap a kashu kasha ni hte Htai mung kaw du nga ai myusha ni hpe saw shaga let galaw wa sai re lam tsun ai.
Nlu shangut da ai bungli (Nau Gup) hpe myusha ni hte rau shangut lu na matu yaw shada ai lam re hte, Htai mung dan hta du nga ai myusha ni hpe htung hkying hte seng nna n-mat mat na matu, Sut masa lam hta mung shakut shaja let, tinang a kanu mungdan de bai lu daw jau lu na matu yaw shada let galaw sa wa ai re lam chyelu ai.
“ Ndai zawn lu shang lawm lu ai majaw grai kabu ai, shaman chyeju mung rai sai, anhte ramma ni grai naw shakut ra ai, Labau ni hpe mung grai hkaja na sakse madun dan ai lam ni galaw ra nga ai” nga na ndai lamang hta shang lawm ai ramma langai kawn tsun ai.
“dai ni poi hpe byin wa hkra lajang ya ai majaw grai chyeju dum ai, shang lawm lu ai majaw mung grai kabu ai, ramma langai hku na n dai zawn labau ni hpe chye la lu ai majaw grai chyeju dum ai” lamang shang lawm ai kaga ramma langai kawn mung tsun ai.
Hpu shawng hpu ba ni, Ningbaw ningla ni hpang da ai magam bungli n-ngut kre shi ai, ngam nga ai myusha ni, shan hte a rawt malan nli hpe gat hkai ra na re hte, anhte matut na shakut ra na re lam, KIA Dukaba Wawhkyung Zau Doi kawn tsun wa ai.
Chyeju Wunli Hpringtsup ai (64) ning hpring Rawt Malan Ninghtoi hta magam gun (50) ning hpring sai myusha share ninghkring ni hpe, Ja Dakkhama shagrau ai lam hpe KIO/KIA ginjaw hta galaw wa sai re hte, Ja Dakkhama Shagrau hkrum ai Du/Salang ni gaw, Salang Kaba Labya Tang Gun (Sut Masa Magam Dap Lit Hkam), Du Up Jum Hpauna Gum San Seng (KIC Ningtau Amu Madu), Du Up Jum Pauhkyi Zau Hpan (Dai Lawn Rung), Du Up Jum Hka Hkran Yaw Htung (Dai Lawn Rung), Du Up Chawzang Dai Hkawng (Masat (4) Dap Ba), Du Up Nra La Awng (Masat (2) Dap Ba) ni re lam chyelu ai.
64 Lang Na Rawt Malan nhtoi hpe mungkan shara shagu du nga ai, myu sha ni mung, masat masa lamang ni hpe, galaw wa sai lam na chyelu ai.
