Lai wa sai 2024 ning July 25 ya shani, myen hpyen dap gaba hpe Kukang hpyen hpung (MNDAA) ni kawn htim gasat nna, zin madu da ai, Sam Mung, Lashu muklum kata hta shim lum lam gaw, tara masa (ဥပဒေ) malawng maga nnga ai masa hku re lam, buga masha ni tsun ai.
Lashu muklum kata na, mung masa lam, up hkang lam, hpaji lam hte kaga lam ni yawng hpe MNDAA hpung kawn, woi awn galaw nga ai rai tim, shan hte a up hkang ai mung masa lam ni hte gara masa hku galaw taw ai ni hpe gaw, mung shawa ni asan sha chye na hkawn hkrang lu ai lam nnga ai re hpe na chyelu ai.
“Lai wa sai shani, mare kata damya shang ai lam byin mat ai, dai mang hkang hpe mung gara hku hparan kau sai kun nchye ai, mang hkang byin wa yang mung gara kaw sa shawk na pi nchye ai”, nga Lashu kaw shanu nga ai buga masha langai tsun ai.
Lashu muklum kata shawoi na hta hpai da da ai, လောင်းကစား galaw ai shara ni, tsa dut mari ai shara ni, grau law wa ai rai nna, dai ni hpe, dan dan dawng dawng galaw nga ai re lam chye lu ai.
Muklum kata, miwa shang ai lam grau law wa ai re hte, mungdan a tara ni hpe hkan shatup ai lam ni mung n nga ai rai nna, “Miwa ni, lam a tara hpe n hkan ai sha, kam mara mawdaw ni gawt ai, one way gawt ra ai shara ni nga tim kam ai hku gawt ai”, ngai, buga masha langai kawn tsun ai.
Dai zawn mawdaw hpe kam mara gawt nga ai majaw, mawdaw adawt ai mang hkang ni byin wa yang mung tara ဥပဒေ hku n sa ai sha, shada adup gayet galaw hkat ai hku nna, mang hkang hpe hpran nga ma ai lam, buga masha ni kawn tsun ai.
“Ya hte sha lam kaw, mawdaw adawt hkat ai mang hkang kaw mung Miwa ni n-gun lang nna, adawt ai wa hpe jawm adup ma ai, shim lum lam pyi nnga sai,” nga buga masha langai tsun ai.
Lashu muklum kata hta uphkang nga ai masa lam ni hta kaja ai lam ni nga ai zawn, nkaja ai lam ni mung grai law ai re lam na chye lu ai. A hkun hkangse (အခွန်) hta ai lam grai law ai majaw, mung shawa ni a matu grai nga yak wa ai re hte, gun rai manu ni mung yawm wa ai lam nnga ai sha, lani the lani lung jat taw nga ai re lam chye lu ai.
Machyi makaw hte seng nna, tsi mawan ni hpe gaw manu hpa ai hku lu taw ai rai nna, tsirung de sa tim, loi hkyam sa ai hku tsi tsi hkam la lu ai lam chyelu ai.
“Ma ni a hpaji lam hte seng na atsawn galaw ya na matu nga, nta shagu, ma ni a mying, asak ni hpe sa hta ai lam ni nga ai” nga buga masha tsun ai.
Lashu muklum kata, Kukang (MNDAA) ni up hkang nga ai hta ,Wa hpyen hpung (UWSA) ni hte mung, pri nem hkra nga taw ai re hte, Lashu zing ai majan hta UWSA hpyen hpung ni nshang lawm ai rai tim, Lashu kata hta UWSA hpung mung shara la tawn da ai re lam chye lu ai.
Mung shawa ni gaw, majan hte seng nna hkrit tsang ai lam ni law law byin nga ai re hte, MNDAA hpung a uphkang ai kata hta nga nna, mung masa manghkang zim taw ai nre majaw, myen hpyen dap a nbung li bawm ni wa jahkrat gasat bun na hpe hkrit tsang nga ai zawn, shimlum lam nnga ai hte majan laja lana bai byin wa na hpe hkrit tsang nga ai a majaw hprawng na matu galoi mung, jin jin lajang da ai re lam buga masha ni tsun ai.
