2025 ning February shata 19 ya, jahpawt jau aten hkying 1 grupyin hta Jinghpaw Mungdaw, Laiza makau na, Daw Hpum Yang ginra hta, myen hpyen dap kawn nbungli hte bawm wa jahkrat bun ai majaw, Wangang mare na masha 7 asak si sum wa sai lam chyelu ai.
Nbungli bawm gaw, Sam mare hta wa hkrat kapaw na, bawm wa hkra ai nta na, masha gaba 4 hte ma 3 asak si sum mat ai re hte hkala nba hkrum ai masha ni mung nga ai re lam na chye lu ai. Wangang hte Nangi ngu ai mare lahkawng hta, aten langai hta sha, bawm wa jahkrat bun ai re lam na chye lu ai.
Asak si sum mat ai mare masha ni gaw, Salang Maung U (asak 53 ning), Jan Daw Aik Sau (56 ning) , Salang Sai leng (25 ning), Jan Cherry Htwe (22 ning), ka lia (3 ning), Yun Mi Mi Sar (10 ning) hte Awng Lin Htet (9 ning), ni re lam, dai mare na sara num langai kawn, tsun da ai hte maren chyelu ai.
“An hte na mare makau na rai nga ai, nkau ma ni gaw dai maga de na lawm ai. mung masa npyaw wa ai majaw ma ni hte pi atsawm n lu hkrum ai. ma ni na matu grai tsang wa ai, jawng mung gara hku rai na kun nchye tsun ai, mung masa npyaw wa yang gaw jawng pat na masa mung mai byin wa ai” nga nna Man Nawng mare hta magam gun nga ai sara num kawn tsun ai.
Myen hpyen ni kawn ndai zawn bawm wa jahkrat ai lam ni a majaw mung masha ni si hkala hkrum ai lam, law taw sai mung rai nga ai, “ Bawm nau jahkrat ai majaw gara hku byin wa na re pi nchye ai, galoi mung hkrit tsang ra taw ai” nga nna Laiza mare masha langai kawn tsun wa ai.
Manmaw muklum kata majan baw hpang ai aten kawn, myen hpyen dap gaw, Jinghpaw Mungdaw shara shagu hta Drone, hpyen gasat nbungli ni hte, bawm jahkrat gasat ai lam ni hpe shawoi na hta grau galaw wa ai mung rai nga ai. Dai zawn bawm jahkrat gasat nga ai a majaw, mung masha ni asak si sum ai lam ni mung matut manoi byin taw nga ai re.
