Myitkyina ginwang kata, Ubyit mare hta hpaw tawn ai Pat Jasan hpung kawn, Slg. Yawhan Na-Wang Awng Myat (54) ning hpe 2025 February 13 ya shani rim jep ai hta, lata lai nna, dai Salang gaw asak si sum mat ai lam, na chyelu ai.
Kani nang hpam lu sha ai ni, dut ai ni hpe, dam jaw ai, sadi jaw ai lam ni galaw nga ai, Ubyit mare na, Pat Jasan hpung ni gaw, Ubyit mare de jahkring sadu ai, Slg. Yawhan Na-Wang Awng Myat hpe February 13 ya shani rim woi mat nna, February 15 ya shani hta gaw, asak nnga mat sai, shi a hkum tsawp moi mang hpe Myitkyina muklum, Shata Pru lawk kaw nga ai, shi a dum nta de wa sa da ai re lam na chyelu ai.
Ndai mabyin hte seng nna, Ubyit mare masha ni, bai tsun dan ai majaw, ngam nga ai dum nta masha ni mabyin hpe chyelu ai re hte, Pat Jasan hpung kawn tsun ai gaw, machyi makaw a majaw, asak nnga mat ai lam, dum nta masha ni hpe, tsun nna, moi mang hpe wa sa ai re lam na chyelu ai.
“Baw hta ma, adup da ai hkang hkang ai” nga Shata Pru kaw nga ai mare masha langai kawn, shi mu mada lu ai hpe tsun wa ai.
Ndai manghkang hpe Jinghpaw htunghkying hku shangut shakre da ai re hte, Pat Jasan kawn gum hpraw kyat sen 80, shat lit hte dum nta masha ni hpe, sa tawng ban da ai lam, na chyelu ai.
Slg. Yawhan Na-Wang Awng Myat gaw, rim hkrum nna, hpang shani February14 ya shani hta Pat Jasan ni adup gayet ai a majaw nnga mat ai re hte, February 17 ya shani hta makoi mayang ai lamang hpe, galaw sai lam chyelu ai.
Ndai zawn adup gayet ai hta shang lawm ai, Pat Jasan hpung hta masha yawng 11 rai nna, hpung hpe woi awn ai ning baw hta lai nna, ngam ai maroi 10 gaw hprawng yen taw nga ai lam, buga masha ni tsun ai.
Ubyit mare Pat Jasan hpung kawn, shawng daw de mung, kani nanghpam lu sha ai ni, dut sha ai ni hpe, dam jaw ai hta, lata lai ai lam ni, byin ga sai rai nna, ndai kalang hta gaw, masha asak si sum ai du hkra byin mat ai re lam chyelu ai.
Ndai lam hte seng nna mung masha nkau gaw, “hpang na kalang daihku nbyin hkra tara (ဥပဒေ) hte hkrat a hkyat la yang kaja ai” nga ning mu ni nga ai zawn, “ N dai lam hta lata lai ai mung, ma byin ai, dasang galaw ai mung mai byin ai, dai zawn nbyin hkra galaw nna, masha hpe manu nshadan ai dai hku galaw ai ni hpe gaw atsawm ahkyat la yang kaja ai,” nga nna, buga daju, shinggyim wuhpung langai kawn tsun ai.
Pat Jasan hpung ni hku nna mung, tinang a ginra hta kani nanghpam lusha ai ni law wa ai manghkang hpe pat jasan ai maga rai nna, ya na zawn lata lai mat ai lam ni byin hkrum hkra mat ai dum nta masha ni hte gara hku pri nem hkra galaw na hpe mung, masha kaba ni atsawm myit ra na re lam, lahta na buga masha wa tsun ai.
“KBC (Jinghpaw Wunpawng Hkalup Hpung Ginjaw) hku na mung, hpaw tawn ai Pat Jasan ni hte seng nna atsawm lajang ra ai, hpang de dai hku nbyin na matu mung sadi ra nga ai” nga na Shata Pru kaw nga ai, buga masha langai mung shi a ningmu hpe tsun ai.
Slg. Yawhan Na-Wang Awng Myat asak si sum mat ai hte seng nna, ngam nga ai dum nta masha ni gaw, grai myit ngut taw ai re hte, ndai lam hte seng nna KBC hku nna gara hku bai lajang sa mat wa na, lata shalai da ai Pat Jasan hpung na malawm ni hpe mung, gara hku ahkyat la sa mat wa na lam ni hpe mung, atsawm nchye lu shi ai re.
