Myen hpyen ni gaw, suicide drone lang nna Wunpawng Mungdan Shawnglawt Hpyen Dap (KIA) ginjaw ginra Laiza hta 2025 February 25 ya shani kalang mi bai wa gasat nga ai lam, buga masha ni kawn tsun ai.
Suicide drone ni gaw, Laiza mayan hte Laisin bum ni hta wa hkrat kapaw nna, ndai shiga ka taw ai ten hta nlaw htum mali lang bat wa jahkrat gasat ngut sai re lam chyelu ai.
Ndai zawn, myen hpyen ni kawn, suicide drone lang nna, htim gasat ai hta, si hkala hkrum ai shiga hte seng nna gaw, ya ten tup hkrak nchye lu shi ai re hte, KIA hte pawng hpawm hpyen hpung ni kawn, Manmaw muklum hpe htim gasat wa ai kaw nna, myen hpyen ni gaw, Laiza hpe suicide drone lang nna, jahkring hkring htim gasat wa ai mung rai nga ai.
2025 ning February shata praw 6 ya shana hkying 10:45 PM hte January shata 24 ya shani hta mung, Laiza muklum kata myen hpyen ni gaw, suicide drone hte gasat wa sai mung rai nga ai.
Ndai ten hta, KIA hte pawng hpawm hpyen hpung ni gaw, Manmaw muklum kata na, hpang jahtum ngam nga ai, tsa-ka-hka 21 hpe laja lana htim gasat nga ai mung rai nga ai.
