Sum mung, Kachin substate ginra rai nga ai, Mungmyit Sinli, Man Mawk mare hta hpunau Balawng hpyen hpung (TNLA) hte Wunpawng Mungdan Shanglawt Hpyen Dap (KIA) hpyen hpung ni a lapran, February 27 ya shani hta kalang mi bai adup gayet hkat ai lam byin wa sai hpe chyelu ai.
2025 February 27 ya shani hkying 1:00 pm ten kaw nna, shana de hkying 5:00 pm aten daram du hkra, KIA hpyenla ni hte TNLA hpyenla ni a lapran, adup gayet hkat ai manghkang, byin wa ai re hpe na chyelu ai.
N-gun 160 daram nga ai, KIA dung 34 na hpyenla ni hte, hpyen n-gun 500 daram nga ai, Balawng (TNLA) hpyen hpung ni a lapran adup gayet hkat wa sai rai nna, ndai mabyin hta KIA hpyenla 11 machyi hkala hkrum wa sai re lam chyelu ai.
Dingda Sam Mung ginra kata, Kachin substate shara hkan hta (TNLA), Wa Rawt Malan Hpung (UWSA), Kokan Rawt Malan Hpung (MNDAA) hpung ni hte (KIA) a lapran manghkang byin ai lam ni, ndai laman law jat wa nga ai re.
Hpunau rawt malan hpung ni hte KIA a lapran, uphkang ginra hte seng ai mang hkang ni byin taw ai sha n ga, mung shawa ni a ntsa hta mung, hpunau rawt malan hpung ni kawn, mang hkang ni sha byin nga ai re lam chyelu ai.
2025 February shata 11 ya shani hta mung, Lashu ginwang kata na Bang Sau mare hta UWSA hpyen hpung ni kawn Bang Sau Hpaji Jawng hta hpyen dap hpaw ai lam ni ga law wa ai hpe mare masha ni ning hkap ai lam galaw ai hta TNLA hpyen hpung ni kawn mare masha ni hpe ninghkap, jahkrit shama ai lam ni galaw wa sai re.
KIA hte TNLA hpyen hpung ni a lapran, lamu ga mang hkang hta, madung gaw sut masa lam a majaw rai nna, Dima ginra hta TNLA hpyen hpung ni dap jung shara la wa ai kawn n-dai manghkang byin wa ai re lam na chye lu ai, Dai shara hta hpyen dap jung shara la wa ai lam hpe nra sharawng ai majaw Kuthkai, Namhpaka, Nam Um de na, Jinghpaw ramma ni kawn TNLA hpyen hpung ni hpe, ning hkap ai lam ni galaw wa sai re.
Ndai zawn byin nga ai manghkang ni hte seng na, wuhpung lahkawng maga na, lahta tsang Du kaba ni a lapran, bawngban jahkrup taw ai lam ni nga tim, lawu tsang hpyen dap kata manghkang ni matut byin nga ai re.
2025 January shata kaw nna TNLA hte KIA a lapran, lamu ga hte seng ai mang hkang ni laja lana byin wa sai rai tim, sai hkaw ai lam ni nnga hkra, myit azim sha tawn let, mung masa lam hte atsawm hparan sa wa na lam ni hte bawsang myusha sha da myit hkrum ai hte Myen hpyen hpe madung tawn shamyit sa wa na matu madung rai ra ai nga nna, KIA hte TNLA ning baw ni ndau wa sai mung rai nga ai.
Lahta tsang madang de bawngban jahkrup nga ai rai tim, manghkang ni matut manoi byin wa ai hpang, mung shawa ni a n-tsa TNLA hpyen hpung ni kawn, garan ging hka ai lam ni galaw wa nga ai nga buga masha ni tsun ai.
