Lai wa sai March Shata 4 ya shani hta Myitkyina, Njang Dung lawk hta nga ai အမှတ် (6) Jawng shawng na maza sumpum kata hta plastic hte gayawp da nna kadai re nchye ai, masha si mang langai hpe mu ai lam, Myitkyina muklum na buga masha ni tsun ai.
Si mang hpe yu yang loi asak gaba sai num rai nna, baw maga gaw plastic achyang hte gayawp da ai majaw myi man hpe atsawm nmu lu ai rai nna, mang hpe mung gara ten hkan sa gabai da ai hpe mung, nchye lu ai hte, manam gaw grai manam taw sai nga na Myitkyina mare masha ni tsun ai.
Mang hpe ya ten du hkra Myitkyina muklum na mang da gawk (ရင်ခွဲရုံ) kaw tawn da ai rai nna, mang madu re nga nna, kadai mung matut mahkai n-galaw wa shi ai lam na chye lu ai.
Ndai manghkang amu (အမှု) hpe sagawn nga ai, pyada ni mung ndai lam hte seng nna ya du hkra hpa majaw re lam sawk tam nmu, nchye lu shi ai re hte, “Ndai zawn re ai Amu ni hpe lu sagawn, sawk sha praw ai lam ni grai yawm ai, nmu ai daram pi re ai “ nga mare masha ni tsun ai.
Myitkyina hta ndai zawn masha sat ai lam ni byin taw ai gaw lang hte lang rai wa nga sai hte, lai wa sai February shata hta mung, Dapkawng hte Shatapru lawk lapran na, Japan mahkrai hta la kasha langai a si mang hpe mu nna, de shawng hkan mung nhki hte galun hkrum nna si mat ai ni nga ai re lam chyelu ai.
“Masha sat ai amu gaw ndai hpang de grau law wa ai hpe mulu ai, mung masa, uphkang ai tara masa ni atsawm nnga wa ai majaw grau nna gwi wa ma ai, lagut, damya, hkyi ya (kaniya) ni mung grai law wa ai majaw hkawm sa hkawm wa hpe shawoi na hta grau nna sadi ra nga ai,” nga buga masha ni tsun ai.
Myen hpyen asuya kawn, mungdan a ahkang aya hpe maja zing madu la ai hpang, myen mung masha ni yawng yakhkat jamjau nga ai re hte, Myitkyina hta mung lusha manu ni htam 3 daram lung taw ai rai nna, Myitkyina-Mandalay lam pat da ai a majaw, gun rai manu ni tsaw wa nna, malu masha ni grau yak wa ai re lam chyelu ai.
Myitkyina ginwang kata Internet line nlu ai hpang kawn ndai zawn re ai masha sat ai Amu ni law wa ai sha n-ga, Myitkyina Tsi Rung kata, masha mang tawn ai, mang da gawk (ရင်ခွဲရုံ) hta madu nnga ai mang ni grai law wa ai lam chye lu ai.
