KIA hte TNLA a lapran manghkang grau sawng wa
Lai wa sai 2025 ning March shata praw 7 ya sha ni, shana maga hkying 5 aten daram hta Balawng hpyen hpung (TNLA) kawn, dingda Sam Mung, Kutkai mare kaba na Wunpawng Mungdan Shanglawt Hpyen Dap (KIA) a rung (GMH) hpe sha n-ga, Kutkai laksan ninghtawn rung hpe mung n-gun laba hte sa zing madu la kau ai lam ga law wa sai rai nga ai.
Rim woi mat wa ai, dai rung na KIA magam gun ni hpe gaw, Kutkai muklum shinggan na shanglawt dap de sa kau ai re hte, KIA ni kawn rung hpaw mayu jang, shan hte hpang de tara shang laika shawk shawn ai lam, galaw ra na re nga nna, TNLA hpyen hpung kawn, tsun ndau wa sai mung rai nga ai.
“Madung gaw anhte myu tsaw mare sin ni hpe wa gawt shapraw ai re ai, Kutkai kaw KIA tsep kawp n-nga hkra ngu ai masing re ai,” nga, Kutkai mare masha langai kawn tsun ai.
TNLA gaw, Kutkai mare kata hta hpyen n-gun shingkan madun hkawm nga ai re hte, shan hte a hpyen jawng ma ni hpe mung (ကင်းပတ် ) hku nna woi hkawm taw nga ai re lam na chyelu ai.
Ndai zawn byin nga ai manghkang ni hte seng nna, wuhpung lahkawng maga na lahta tsang ning baw ni a lapran, bawngban jahkrup ai lam ni galaw nga ai rai tim, laklai ai mahtai gaw, ya ten du hkra npru wa shi ai mung rai nga ai.
Ndai manghkang ni hte seng nna, dingda Sam Mung mare masha ni hte bawngban ai lam galaw nna, lu la ai mahtai, myit hkrum lam hte maren, gara hku bai galaw sa wa na lam hpe lu dawdan na re lam, KIA/KIO a Lat Du Up Jum (ဒုဗိုလ်မှူးကြီး) Sumlut Gun Maw kawn, social media (facebook) ntsa ka mara tawn ai hpe mu lu ai.
“Matut mai byin wa na lam gaw KIA hte majan byin yang she Miwa a Ja gumpraw garum ai hpe lu la na re majaw gaw manghkang tam ai lam dingyang rai taw nga na mara ai. Lahta tsang Du Salang ni mung grai dawdan yak ai bungli gaw rai nga na mara ai, Sam hpyen hte Mungmyit Sinli ga na Mung shawa ni a myit dawdan ai lam hta hkan nna bung li galaw mai na re ngu mu mada ai.” nga Kutkai Chyum Jawng hta magam gun nga ai, sara langai kawn tsun wa ai re.
Kutkai ginra deng 38 Man Pying, lahta Sam Mung ginra. lam maw kaji/kaba de hkawm sa na Wunpawng hpan mung shawa ni 2025 March shata praw 10 ya shani kawn hkawm sa hkawm wa grai sadi maja ra na re lam, buga masha langai kawn tsun shana wa ai re.
“Ya Kutkai a sinpraw maga TNLA n-gun 300 jan , Kutkai a sinna maga TNLN n-gun 400 jan , deng 38 Man pying makau de TNLA n-gun 200 jan gayin hkawm sa taw nga ai re majaw Jinghpaw Wunpawng myu sha ni marai 1,2 sha hkawm sa ai lam n-galaw ga. Koi yen nlu hkawm sa ra jang mung, ni nawn ai nta masha, makyin jinghku jingyu ni hpe jau nna, tau shana da, masha law law hte hkawm sa ga ngu shana dat ai,” nga. Kutkai mare masha langai kawn, tsun shana wa sai re.
2025 February 27 ya shani, KIA hpyenla ni hte TNLA hpyenla ni a lapran, adup gayet hkat ai manghkang byin wa sai re hte, February shata 11 ya shani hta mung Lashu ginwang kata na Bang Sau mare hta UWSA hpyen hpung ni kawn Bang Sau Hpaji Jawng hta hpyen dap hpaw na matu galaw shakut wa ai hpe mare masha ni, ninghkap ai lam galaw ai hta TNLA hpyen hpung ni kawn, mare masha ni hpe jahkrit shama ai lam ni galaw wa sai mung rai nga ai.
