Wunpawng Mungdan Shanglawt Hpyen Dap (KIA) hte myen hpyen dap a lapran matut manoi majan byin nga ai, Jinghpaw mungdaw, Manmaw muklum kata na, dakkasu jawng maga de 2025 March shata 22 jahpawt maga kaw nna majan laja lana bai byin wa ai lam, na chyelu ai.
March shata 22 ya jahpawt hkying 5 am jan daram kaw nna dakkasu jawng wang kata hta, KIA hte pawng hpawmg hpyen hpung ni hte, myen asuya hpyen hpung ni a lapran laja lana gasat hkat wa ai re lam chyelu ai.
Manmaw dakkasu jawng wang kata, dap jahkrat shara la nna, rawng nga ai, myen hpyen hpung ni hpe, KIA hte pawng hpawm hpyen hpung ni kawn, wang matep tawn ai hta, myen hpyen hpung ni kawn, pru wa lu na matu, maja n-gun dat nna, gasat wa ai a majaw, majan laja lana byin wa ai re lam, KIA shawng lam shiga lawk kawn na chyelu ai.
KIA hte pawng hpawm hpyen hpung ni kawn, Manmaw muklum na, myen hpyen dap a tsa-ka-hka 21 dap hpe lu zing na matu, htim gasat taw nga ai mung re.
Jinghpaw mungdaw, Waimaw ginwang, Lamyang mare maga de mung, hpyen shamu shamawt sa wa ai, myen asuya hpyen hpung ni hte KIA hpyen hpung ni a lapran, March shata 21 ya shani hkying 3:10 PM daram kawn gasat hkat wa sai rai nga ai.
2025 March shata 23 ya shani, hkying 11:50 Am aten daram hta, Jinghpaw Mungdaw Hpakan sa lam kaw Majan byin wa sai re hte, March 22 ya shani hkying 1:00 Pm aten daram hta Lung Bra mare, deng (5,6) lapran Hpung gaw hta lung wa ai, myen asuya hpyen hpung n-gun 30 daram hte, KIA hpyen hpung ni a lapran majan byin gasat hkat wa sai re lam, buga masha ni tsun ai.
