2025 March shata praw 5 ya shani, shana maga aten hta, dingda Sam Mung, Kutkai ginwang, Myunggyi mare daju, Pyin Hkan Hka Hku mare hta Kokang (MNDAA) hpyen la ni kawn sinat hte gap sat kau ai, Kachin myusha maroi 6 a mabyin hte seng nna, ya ten du hkra, tara dawdan ai, je yang ai lam ni, nlu galaw shi ai re hpe na chyelu ai.
MNDAA hpyen la ni gap sat kau ai, Kachin myusha maroi 6 hta Wunpawng Mungdan Shanglawt Hpyen Dap (KIA) hpyen la 2 lawm ai hte ngam ai maroi 4 gaw mare masha ni re lam chye lu ai.
Hkala sawng nna, tsi tsi hkam la nga ai ni hpe gaw, tsi manu ni jaw ya ai raitim, gap sat hkrum ai ni, tara rap ra ai lam lu la na matu, mare masha ni hpyi shawn da ai lam hpe gaw, MNDAA ni kawn shadik ya na nga nna, ntsa lam ndau shana da ai raitim, lahta tsang du kaba ni kawn, tara je yang na lam hte seng nna atsawm naw bawng ban taw ai re lam na chye lu ai re.
Ndai mabyin nbyin shi ai aten kawn Pyin Hkan Hka Hku mare ding yang, (MNDAA) ni gaw Miwa hte pawng nna, ja htu sha ai lam ni galaw wa ai hpe, mare masha ni kawn nra sharawng ai majaw, ning hkap ai lam galaw ai kawn ya na zawn asak si sum ai du hkra byin wa ai mung rai nga ai.
“mare masha ni yawng jawm tsun ai ndai kaw ja nhtu na matu moi kaw na mare masha ni kadai hpe mung ahkang n jaw ai,” nga kutkai mare masha langai kawn tsun ai. March shata praw 5 ya shani ninghkap n-gun madun ai lam galaw ngut nna, wa ai lam hta MNDAA hpyen la ni kawn sinat hte gap ai re lam chyelu ai.
Ja sa htu ai shara gaw Pyin Hkan Hku mare masha ni a matu ahkyak dik ai shara rai nna, dai shara hta hka atsawm pru ai majaw, dai hka hpe madung tawn nna mare masha ni gaw hkauna galaw ai, kaga hkai sun galaw ai lam ni hta madung tawn, jai lang nga ai re majaw Ja sa htu ai lam ni hpe nra sharawng ai re lam chyelu ai.
Sam mung ginra kata hta Balawng hpyen hpung TNLA, KIA hte MNDAA hpyen hpung ni kawn tinang lu madu zing tawn ai shara ni hta, up hkang nga ai rai nna, KIA hte TNLA hpyen hpung ni a lapran uphkang ginra hte seng nna, nhtuk hkat wa ai a majaw, ginra masha ni shim lum lam a matu, myit tsang nga ai ten, ya na zawn MNDAA hpyen hpung ni kawn, mare masha ni hpe, sinat hte gap sat ai mabyin byin pru wa ai mung rai nga ai.
Pyin Hkan Hka Hku mare hta ya ten du hkra mare masha ni kawn, MNDAA hpyen hpung ni hpe ninghkap ai lam matut manoi galaw nga ai re hpe mung na chyelu ai.
