Ndai laman Myitkyina hte Waimaw muklum kata hkan bawm jahkrat ai hte, mare kata de sanat gaba gap bang ai lam ni grau sawng wa nga ai re hte, sinat kaba hkrat kapaw ai majaw, Myitkyina muklum kata mare masha si hkala ai lam byin wa sai re.
2025 ning April shata 25 ya shani kawn bawm nsen, sanat nsen ngoi ai lam ni grau sawng wa ai re hte April 28 ya shani du hkra bawm nsen ni naw ngoi nga ai re lam chyelu ai.
Manmaw majan laja lana bai byin hpang wa ai aten kawn, Myitkyina hte Waimaw muklum kata hkan bawm, sanat ngoi ai lam grau sawng wa ai re hte, lai wa sai April 25 ya shana maga Myitkyina, Tida lawk (သီတာရပ်ကွက်) ဝန်ထမ်းအိမ်ယာ sha ra hta bawm wa hkrat ai majaw nta, htingra hteng za ai hte maw daw lam ni loi hten mat nna, nhkun byin mat ai hte masha si hkala ai lam byin wa sai rai nga ai.
“Ya hte (April) 25 ya shani jahpawt maga hkying 5, hkying 6 daram kaw na Myitkyina, Waimaw hkan bawm grai ja sawng wa ai, 25 ya shana hkying 11:30 pm, hkying 12 daram hta bawm wa hkrat ai majaw, la kasha lahkawng si na, num kasha langai hkala ai. Dai hpawt ngai wa yu yang ဝန်ထမ်းအိမ်ယာ lam kasha hkan lam she wawk (nhkun byin) taw nga ai,” nga Myitkyina mare masha langai tsun ai.
Ndai zawn, mare kata hkan laknak kaba hkrat kapaw nna, masha kade si hkala hkrum ai hte seng nna gaw, tup hkrak nchyelu shi ai re.
“ngai sa yu ai shaloi ဝန်ထမ်းအိမ်ယာ nta na pat ni hkan pala hkang ni hkrai, shakum hkan ma, lam hkan na bawm (chyen ngam) ni, nta hkan kap taw ai pala ni hpe gaw, Myen asuya kawn sa jep ai sha loi, shan hte yawng zing mat ai,” nga lahta na mare masha kawn tsun ai.
Manmaw muklum kata hta majan laja lana bying nga ai ten, Hpakan grinra de mung Myen hpyen hpung ni hte Sam hkyen pawnghpawm hpyen hpung ni, maja htim lung wa ai majaw, majan laja lana byin nga ai re.
Myitkyina hte Waimaw kata na masa lam a majaw Bala Min Htin mahkrai hta jep san ai lam ni grau bai sawng wa ai re hte Mahkrai kaw lai wa ai la ni hpe grau jep san nga ai re lam na chyelu ai. Myitkyina hte Waimaw lapran hkawm sa hkawm wa yak hkak nga ai re hte Myikyina mare masha ni gaw Myitkyina muklum kata majan byin wa na hpe grai hkrit tsang nga ma ai lam chyelu ai.
