lai wa sai 2024 ning September 29 ya shani, Wunpawng Mungdan Shanglawt Hpyen Dap (KIA) hte pawnghpawm hpyen hpung ni kawn, gasat zing madu la wa sai Chipwi mare na mare masha ni gaw kanbau bungli a matu grai yak nna, jamjau nga ai lam na chyelu ai.
KIA uphkang ginra nrai shi ai ten, Chipwi mare na nta shagu ngu na daram hta nta masha langai gaw, myen asuya a magam bungli ni hta galaw ai re lam chyelu ai.
“Ndai Chipwi hta gaw Lachik , Lawngwaw, Lisu ni grau law nga ai, kaga hpan ni, myen, sam ni ma loi nga ai. Ndai kaw nga ai ginra masha ni gaw moi myen asuya (up ai) re shaloi asuya magam bungli galaw ai ni grai law ai, dai majaw ဝန်ထမ်းမြို့တော် ngu na pa shamying ma ai,” nga Chipwi mare hta galaw nga ai buga bawng ring masing kata na food security dap hta magam gun nga ai, sara langai kawn tsun ai.
KIA kawn shara bai jaw ai asuya bungli (Position) ni hta jinghpaw laika chye ai ni hpe sha grau nna madung tawn shara jaw ai re hte, mare na asuya magam gun dingsa nkau gaw Myitkyin hkan asuya bungli ni bai matut galaw mat ai ni nga ai zawn, nkau gaw gat dut, hkai sun bungli ni galaw mat ai lam chyelu ai.
Chipwi mare hta nhprang (သတ္တုဆိုက်) htu shaw sha ai shara ni n-nga wa ai a majaw manam jarawp hpaw da ai zawn re ai ni, hpaga galaw ai ni grai yak taw nga ai re hte, hkai sun galaw na shara lu ai ni mung, grai yawm ai lam chyelu ai.
Chipwi mare masha ni kawn KIA uphkang ai kata masa lam hta nau nhkau chyap shi ai re hte, rung bungli ni yawng hta jinghpaw laika hpe madung tawn jai lang taw sai re majaw, jinghpaw laika nchye ai ni a matu yak hkat nga ai re lam chyelu ai.
Mare kata na hpaji jawng ni hta Jinghpaw laika hpe sharin jat taw sai re lam kahtap nna chyelu ai.
Chipwi mare hpe KIA ni zing madu tawn sai shara re majaw, myen hpyen ni nbungli hte bawm jahkrat ding sa na hpe hkrit tsang ai a majaw, mare masha nkau gaw mare shinggan na, lam makau hkan, sum kasha ni gap nna shanu nga ai re hte shani ten hta sha, gat mari na matu mare kata de shang ai re lam na chye lu ai.
KIA hte pawnghpawm hpyen hpung ni gaw, Manmaw muklum kata na ngam nga ai myen hpyen dap ni hpe April shata 24 ya kawn kalang bai htim gasat hpang wa sai rai nna, myen hpyen dap Tsa- Ka-Hka-21 hte Hka-La-Ya-47 dap ni hpe zing lu na matu htim gasat nga ai re hte myen hpyen dap mung, Hpakan maga de hpyen n-gun jat nna, htim lung nga ai majaw, Hpakan sa lam maga de, majan laja lana byin nga ai re lam chyelu ai.
