2025 April 25 ya shani hta myen asuya hpyen hpung ni kawn Hpakan ginra maga de hpyen n-gun jat htim lung wa ai majaw Hpakan lung wa ai lam ding yang kaw nga ai, mare kasha hkan na mung masha ni gaw, Hpakan Sengtawng mare na nawku jawng wang kata de April 28, 29 ya shani hkan kawn du shang hpang wa ai re hte ya ten hpyeng yen nlaw htum 60 daram du nga sai re lam chyelu ai.
Hpakan ginra kata hta sha, hpyen koi yen wa ai ni, nlaw htum hkying mi daram du nga sai re lam na chyelu ai re hte ndai kalang myen hpyen ngun jat htim lung wa ai hta Sam hkyeng hpyen hpung ni mung lawm wa ai rai nna, Sam hkyeng hte myen asuya hpyen la ni a sat lawat hpe hkrit ai majaw, mung shawa ni gaw hpa arung arai ni mung nlu la nna hprawng yen wa ai re lam chyelu ai.
Hpyen yen malawng hpe Nawku jawng shinggan hkan shanu nga lu na matu shara ni hkyen lajang tawn da ya ai lam chyelu ai.
“Ya hte na hkrup ai, hpyen yen (1000) mi daram a matu, shara hkyen na nga tsun ai, Nawku jawng kata hkan gaw nre ai, Nawku jawng shinggan hkan hkyen da ai, ya kalang na hpyen hprawng ai ni wa matsan mayan re, Sam hkyeng ni hpe hkrit na hpa rai pi nlu la wa ai, Sam hkyeng ni gaw grai gwi ai , masha sat ai ma, shan hte na matu hpa nrai taw ai, dai majaw hpa rai ni ma nlu la ai,” nga Sengtawng mare masha langai kawn tsun ai.
Hpakan lung wa ai lam ni pat da ding yang rai nna, Hpakan, Sengtawng hkan na mare masha ni kawn hpyen yen ni hpe jawm garum shingtau ai lam ni galaw nga ai hte Jinghpaw Wunpawng Hkalup Hpung Ginjaw (KBC) kaw na garum jaw na matu hkyen nga ai re lam chyelu ai.
“Ya Sengtawng hkan ma hpyen yen ni du taw sai, lam ni gaw pat da ding yang re ai, hpyen yen maroi 60 daram gaw du taw sai, anhte ni kaw na garum ai lam ni galaw da ai, KBC kaw na gaw garum ai lam ni, grai galaw ai lam ni n-nga shi ai,” nga na, lahta na mare masha kawn tsun ai.
Hpakan de hpyen n-gun jat htu lung wa ai myen hpyen ni gaw, Namya ( နန့်ယား) mare de du lung wa hkyen sai re lam na chye lu ai. “Hpakan de du hkra lu htim lung wa na matu gaw shan hte na matu ma nloi na re, asak grai nawng ra ai lam ni nga wa na, Hpakan grinra grup grup hkan gaw KIA hte pawnghpawm hpung ni grup grup rai taw ai majaw loi gaw n loi na re,” nga Myitkyina mare masha langai kawn shi a ningmu hpe tsun ai.
Manmaw muklum kata Wunpawng Mungdan Shanglawt Hpyen Dap (KIA) hte pawnghpawm hpyen hpung ni kawn, muklum kata ngam nga ai, myen hpyen dap Tsa-Ka-Hka 2, Hka-La-Ya 47 hte dakkasu jawng wang hta shara la tawn ai hpyen dap ni hpe matut manoi htim gasat nga ai zawn, myen hpyen dap mung, nbungli hte bawm jahkrat gasat ai lam ni matut manoi galaw nga ai re.
