2025 May shata 12 ya jahpawt hkying 9 chyeng grup ying daram hta, Sagaing ginra, Dipeyin (ဒီပဲယင်း) ginwang, Otain (အိုးတိန်) mare na laika sharin jawng hta myen hpyen dap kawn nbungli bawm 2 wa jahkrat bun ai majaw jawngma nlaw htum hkun jan hte jawng sarama 2 asak si sum wa sai rai nna, hkala nba hkrum ai 100 jan nga ai lam chyelu ai.
Asak si sum ai malawng maga gaw, lawu tsang jawngma ni re hte hkala sawng ai ni hpe, tsi gawn lajang ya na matu, grai ra ahkyak nga ai lam na chyelu ai.
Hkala ai jawngma ni grai law ai hta, nkau jawngma ni grai sawng ai majaw, asak si sum na hpe tsang ra nga ai re hte, nkau kanu kawa ni gaw, tinang a kasha ni hpe tam nmu shi ai re lam chyelu ai.
Sagaing ginra, Mawlu muklum hta mung, May shata 12 ya shani ka-ang hta myen hpyen ni nbungli bawm 3 lang daram wa jahkrat bun ai a majaw, masha 2 asak si sum nna, nlaw htum masha 7 daram hkala hkrum wa sai re lam chye lu ai.
“Ya na ndai mabyin a majaw ma ni hpe hkrai sha jawng de dat na pyi grai tsang wa ai,” nga na နန့်စီးအောင် mare masha langai kawn tsun ai.
Myen hpyen ni kawn Majan baw htim gasat ai lam laja lana galaw nga ai re hte ya ten Jinghpaw mungdaw Hpakan hpe htim gasat na matu madung tawn nna, myen hpyen dap gaw, hpyen n-gun jat lung wa ai majaw, hpakan sa lam hta majan laja lana byin nga ai re hte Manmaw muklum hta mung, matut manoi majan byin nga ai re.
