Laiwa sai, 2016 ning, December shata ka-ang daram kaw, tat sum kau sai, Gidon hpyendap hpe, Wunpawng Mungdan Shanglawt Hpyendap (KIA) hte pawng hpawm hpyen hpung ni kawn, 2024 May shata praw 6 ya shani, bai lu zing la sai lam, KIA magam gun ni kawn, tsun shateng wa ai.
“Gidon hpe daini praw 6 shani ka-ang daram kaw lu zing la sai, hpyen dap jasan ding yang re,” nga KIA magam gun ni tsun ai.
KIA hte pawng hpawm hpyen hpung ni gaw, 2024 May shata praw 5 ya shani hta, Gidon hpyendap makau kaw nga ai, Kagam, Sama, Nhkram hte Nga Gyang hpyendap ni hte rau, Gidon dap hpe kalang ta htim gasat nna, dai hpyendap 4 hpe dai shani jang lu zing la tim, Gidon dap hpe gaw, daini, May shata praw 6 ya shani she lu zing la ai re lam, KIA hpyenla ni tsun ai.
Gidon hpyendap gaw, KIA ginjaw ginra hte dung 3 hpe matut mahkai ya ai lam hta, ahkyak ai shara rai nna, Myen Hpyen Gumshem hpyen hpung ni kawm, shata galu, laja lana htim gasat wa ai hpang, laiwa sai 2016 December 16 ya shani hta, KIA a lata kaw nna, zing madu la kau ai mung rai nga ai.
Makau grup yin na, hpyendap ni hkrat sum mat ai hpang, Gidon dap kaw na, ninghkap gasat nga ai, myen hpyen asuya a hpyenla ni gaw, yawng hprawng mat ai re lam, shawnglam ginra shiga ni hpe lakap le chyelu ai.
KIA hte pawng hpawm hpyen hpung ni gaw, 2024 May shata praw 5 ya shani hta, Sumpra Bum mare kaw dap jung shara la da ai, myen hpyendap Hka-La-Ya 46 hpe mung, padang dip zing la nna, Sumpra Bum mare hpe tsep kawp, tek jum tawn sai rai nga ai.
Contributed by Sinpraw Pyilan
