Sammung, Lashio muklum, lawk 1 kaw nga ai, Sasana Jawng kaw na, Sarama Mary a dum nta hta, 2024 ning July shata praw 3 ya, Jahpawt hkying 7:30 am daram hta, laknak kaba wa hkrat kapaw ai majaw, dum nta masha 6 kalang ta, asak si sum wa sai re lam chyelu ai.
“Nta masha 9 nga ai kaw na, maroi 6 nnga mat ai, Manaw wa gaw, shinggan de pru hkawm taw ai majaw, lawt mat ai, asak 5 ning daram re ai ma hte, shata 8 daram re manga mung lawt mat ai,” nga buga masha ni hpe lakap let, na chyelu ai.
Laknak kaba gap dat ai gaw, myen hpyendap byuha kawng kaw na, kam mara gap bun ai re nga, tsun ai nga ai zawn, rawt malan hpung ni kawn, gap dat ai mung rai na re nga, sawn maram tawn ai lam, buga masha ni tsun ai.
Laknak kaba wa hkrat kapaw ai, dum nta nga ai, Lawk 1 gaw, myen hpyen dap hte mung, ntsan ai shara kaw, nga ai re nga, buga masha ni tsun ai.
Laknak kaba wa hkrat kapaw nna, asak si sum wa sai, buga masha 6 a makoi mayang lamang hpe mung, July praw 3 ya shani galaw wa sai re hpe chyelu ai.
Ndai laman, majan laja lana byin wa na masa nga ai re majaw, Lashio muklum na, buga masha ni, kaga shara de, hprawng koi yen wa sai rai nna, ya ten hta gaw, myen hpyendap kawn, muklum kata pru-shang nmai hkra, pat kau sai re majaw, muklum kata ngam nga ai ni, chyat rawng nga ai re lam, buga masha ni tsun ai.
MNDAA (Kokang), TNLA(Balawng) hte pawng hpawm hpyen hpung ni kawn, Lashio muklum makau de shani wa ai hpang, majan byin hpang wa sai rai tim, muklum kata hta, gasat gala byin ai lam gaw, nnga shi ai re hpe na chyelu ai.
