Miwa asuya kawn, Wunpawng Mungdan Shanglawt Hpyen Dap (KIA) hpe dip n-gun jaw ai hku nna, Miwa mung hte Jinghpaw mungdaw lapran na, lamuga jarit pru shang shara ni yawng hpe, pat hkum tawn ai majaw, mung shawa ni, yak hkak wa nga ai lam, chyelu ai.
KIA hte pawng hpawm hpyen hpung ni kawn, Zahkung Ting Ying woi awn ai, NDA-K up hkang ginra na, mare ni hte hpyen dap ni hpe, 2024 September shata htum wa maga kawn, langai hpang langai, htim gasat zing madu la wa ai hpang, Miwa asuya kawn, lamuga jarit pru shang shara ni yawng hpe pat hkum wa sai mung rai nga ai.
“yak hkak ai lam gaw, (ndai kaw na) mung shawa ni sha nrai, mungdan ting na mung shawa ni a matu yak hkak wa ai ga rai nga ai,” nga, KIO magam gun langai kawn, ninghkawng shiga dap de tsun ai.
Miwa mung lamuga jarit ni hpe pat kau ai hpang, gunrai manu ni rawt mat wa ai hte, ya ten Myitkyina hte Jinghpaw mung daw shara shagu hkan, jak sau ni, taw wa ai re majaw, jak sau manu ni, grai rawt wa sai mung rai nga ai.
Bala Min Htin mahkrai pat kau ai hpang, Myitkyina hte Waimaw mare de pru shang yak mat ai majaw, mung shawa ni a matu, grau nna, yak hkak wa ai mung rai nga ai.
“Hpaw yang gaw, gate (lamuga jarit pru shang shara) ni yawng hpe rau sha hpaw ya na matu KIO gaw tsun da ai,” nga lahta na, KIO magam gun wa kawn tsun ai.
Kanpaiti mare hpe mung, KIA ni kawn, 2024 November 20 ya shani hta zing madu la kau sai hpang gaw, Miwa asuya maga kawn, shawng daw de tsun tawn ai, Kanpaiti hte Loije lamuga jarit pru shang shara ni hpe bai hpaw ya na nga masing mung, hkring nga ai re hte, lamuga jarit pru shang shara ni yawng hpe, bai hpaw ya na hte seng nna, Miwa asuya hte kalang bai bawngban jahkrup ai lam ni mung, nnga shi ai re lam, KIO magam gun wa kawn tsun ai.
“Miwa ni Myen ni hpe garum taw ai re majaw gaw, hpaw na n-hpaw na gaw shan hte Miwa ni hta ma hkan ai, anhte Shanglawt ni gaw hpaw yang gaw yawng hpaw na hku” Ja hkrup da ai re nga, dai magam gun wa kawn tsun ai.
“Miwa hkran gate gaw loi loi hte gaw hpaw na lam n-nga ai, Miwa ni pyi lam she gram taw nga ai,” nga, KIO magam gun wa kawn tsun ai.
