Hpung masha 1500 nga ai, KABA (Kachin American Baptist Association) a 5 lang na hpung shawa zuphpawng hpe America mungdan Texas mungdaw, Camp Copass, Denton mare na, Dallas Fort Worth Jinghpaw Wunpawng Hkalup Hpung a shara hta buga hpung 10 jawm ginlum let 2024 ning, December shata 27 ya kawn 30 ya shani du hkra galaw wa sai rai nga ai.
Ndai zuphpawng gaw, American Jinghpaw Wunpawng Hkalup Ninghtan Hpung-KABA hpaw hpang ai (10) ning hpring chyeju sha kawn hpawng, 7 lang na ramma camp-dabang hte 5 lang na hpung shawa zuphawng hpe Karai Kasang a chyeju hpe shakawn let galaw ai re lam, KABA a ningbaw rai nga ai, Rev. Dr Labya La Seng hte amu madu Rev. Dr Lamung Tu Lum ni kawn tsun wa sai re.
“zuphpawng hpe Kolose 2:6-7 Hkristu hta ru jang nna gawgap ga” ngu ai gabaw hta mahta nna, saw shaga da ai manam ni, magam gun ni hte galaw sa wa ai re lam, Rev. Labya Laseng Kawn tsun ai.
Zuphpawng hta laksan manam hku nna, American Baptist Churches kaw na, Rev. Dr. Roy Madley hpe saw shaga let galaw wa sai re lam chyelu ai..
Ndai zuphpawng hta, Lak lai ai hku nna gaw, America mungdan kaw nga ai, tinang myusha ni a kashu kasha ban ni hpe tinang wunpawng myusha ni a htung hkying hpe shachyen ya ai hte hpawn, matut nna daidaw buga de du hkra, Karai a mungga hte gawgap pawn ba lu na matu yaw shada let, myusha hpe zinlum lu na hte, htung hkying ningli hte makam hpe mung matut nna, gaw sharawt lu na hpe yaw shada let, “an hte manau nau ai, mungga sharin ai, bawngban ai lam ni hpe, galaw sa wa ai,” re nga, Rev. Labya La Seng kawn tsun ai.
KABA hpung hpe laiwa sai, 2014 ning June shata 21 ya shani hta American mungdan, Florida mungdaw na, Jacksonville kaw, hpaw ninghtan dat ai rai nna, Hkristan ni yawng, shanglawm nawku nga ai hpung re lam, chyelu ai.
KABA hpung gaw, mungdan kata de na, myusha ni a matu, ja gumhpraw alu jaw ai, chyum laika gale ai lam hta garum ai, sa sana galaw ai, hpaji sa sana lam ni hta garum ai, kaga mung dan hkan du nga ai Kachin myusha ni hpe ta gindun lam woi la ai lam ni hpe, galaw nga ai re lam, hpung a ningbaw ni hpe lakap let chyelu ai.
