Dallas-Fort Worth, Texas,USA nga Wunpawng Myusha ni yawng masha 400 daram shang lawm ai hte Wunpawng Mungdan Shanglawt Hpyen Dap (KIA) a (64) lang na, rawt malan nhtoi masat Lamang hpe 2025 February Shata praw 9 ya shani galaw wa sai re.
Rawt Malan masat masa galaw ai a yaw shada lam gaw, Wunpawng Mundan Sanglawt Asuya hpe madi sha daw ai lam, Maigan de nga ai Myusha ni mung galoi mung matut n-di Rawt Malan ai lam hta shang lawm nga ai hpe htawng madun mayu ai, tinang a kashu kasha ni hpe mung, tinang a hkring htawng a mai gaja ai lam ni hpe madun mayu ai majaw re lam, lamang shabin shatai komiti lit hkam Slg. Dauje Tu Hkum kawn tsun ai.
Ndai lamang galaw ai a kaga yaw shada lam ni hta, Dallas Fort Worth ginra gaw, Wunpawng myu sha ni a ahkyak ai shara rai nna, America mungdan nga kashu kasha ni hpe mai kaja ai hkring htawng ni sha chyaw ya ai, Wunpawng Mundan Shanglawt Hpung (KIO) hte rau rai nga ai lam hpe htawng madun ai, shawng lam hta tatut shanglawm shakut shaja nga ai share ninghkring ni hpe chyeju dum ai lam htawng madun mayu ai majaw re lam chye lu ai re.
“Mung masa lam hta yawng grai shakut shaja ai hpe mu lu ai majaw grai kabu ai, sut masa lam hta mung hkrat wa na re hpe kam ai , ttung hkying lam hta gadai mung gadai na htung hking hpe manu shadan ai mu ai majaw gabu ai, US hta mung htung hkying lam hpe grau chye na hkra shakut taw nga ai” nga Dallas- Fort Worth of Kachnin Christian lit hkam mung rai nga ai, Slg. Dauje Tu Hkum kawn tsun wa sai re.
Lamang hta gabaw Kaba hku na, Rawt Malan Lamang, Yu ngoi pinra, Rawt Malan masat kumhpa jaw ai lam ni hte KIO ginjaw kawn sha lai da ai Rawt Malan mungga madat hkam la ai lam ni hpe galaw wa sai re.
Lai wa sai, 1961 ning, February shata praw 5 ya shani kaw nna hpang wa ai KIA a rawt malan hkrun lam gaw, 2025 ning February shata praw 5 ya shani hta 64 ning ladu hkrum sai re hte, (64) ning hpring ai rawt malan nhtoi lamang ni hpe February praw 5 ya shani hta mungdan kata hte shingan kaw du nga ai wunpawng myusha ni yawng galaw lai wa sai re.
America mungdan hta sha nu nga ai Kachin Ramma ni, ma ni mung tinang a Kachin myusha lam, rawt malan hte seng ai lam ni hpe chyena wa na matu, kanu kawa ni tsun dan, hkai dan ai lam ni hpe galaw ai zawn, America mungdan hta Kachin hte seng ai wuhpung law law nga ai re hte, Kachin Alliance hpung kaw na mung Myusha hte seng ai lam ni hpe ma ni chye na wa hkra shakut shaja nga ai rai nna, nawku hpung ni, Kachin Communities ni yawng mung shakut shaja galaw nga ai re lam chye lu ai.
Rawt Malan lamang hta ya na zawn, shang lawm lu ai majaw gabu ai hte kanu mungdan de nga ai myusha ni yawng mung grai naw hkam sharang rai nna, rau sha jawm shakut shaja sa wa na lam, lamang hta shang lawm ai ni kawn tsun ai.
Lai wa sai February Shata praw 5 ya shani, Laiza muklum hta galaw ai, 64 ning hpring rawt malan nhtoi hta Shagrau masat masa lamang hpe mung galaw lai wa sai re hte, magam gun (50) ning hpring sai myusha share ninghkring ni hpe, Ja Dakkhama shagrau ai lam galaw wa sai re. Ja Dakkhama Shagrau hkrum ai Du/Salang ni gaw, Salang Kaba Labya Tang Gun (Sut Masa Magam Dap Lit Hkam), Du Up Jum Hpauna Gum San Seng (KIC Ningtau Amu Madu), Du Up Jum Pauhkyi Zau Hpan (Dai Lawn Rung), Du Up Jum Hka Hkran Yaw Htung (Dai Lawn Rung), Du Up Chawzang Dai Hkawng (Masat (4) Dap Ba), Du Up Nra La Awng (Masat (2) Dap Ba) ni rai nga ai.
64 ning hpring ai kaw na simsa wa ai hte Mungdan lu wa na hpe myit mada nga ai re hte, shawng lam hta rai nga ai share ninghkring ni hte asak ap nawng mat wa sai, share shagan ni hpe mung grai chyeju dum let hkungga jaw dat ai lam, ningbaw ningla ni hpe mung grai chyeju dum ai lam, lahpa galai na matu Ramma ni hpe grai tsun shadut ra ai lam ni hpe mung lamang shabyin shatai Komiti lit hkam wa kawn tsun wa sai re.
