Dingda Sam Mung ginra kata, Kachin sub-state shara hkan hta Balawng Rawt Malan Hpung (TNLA), Wa Rawt Malan Hpung (UWSA), Kokan Rawt Malan Hpung (MNDAA) hpung ni hte Wunpawng Mungdan Shanglawt Hpyen Dap (KIA) a lapran manghkang byin ai lam ni, law jat wa nga ai lam, buga masha ni kawn tsun ai.
Hpunau rawt malan hpung ni hte KIA a lapran, uphkang ginra hte seng ai mang hkang ni byin taw ai sha n ga, mung shawa ni a ntsa hta mung, hpunau rawt malan hpung ni kawn, mang hkang ni sha byin nga ai re lam chyelu ai.
KIA hte TNLA a lapran na manghkang hte seng nna, Sam Mung hta shanu nga ai mung masha ni hkrit tsang nga ai lam na chye lu ai. “Lamu ga Kashun mayu ai masa re ai hku mu ai…shan hte uphkang sai ngu ai hpe shangang taw ai lam re… maga mi de gaw, myeng a maw lanyet mung lawm sam ai hku mu ai” nga na kuthkai muklum na, buga masha langai kawn tsun ai.
2025 February shata 11 ya shani hta Sam mung ginra, Lashu ginwang kata na Bang Sau mare hta UWSA hpyen hpung ni kawn Bang Sau Hpaji Jawng hta hpyen dap hpaw ai lam ni ga law wa ai hpe mare masha ni ning hkap ai lam galaw ai hta TNLA hpyen hpung ni kawn mare masha ni hpe ninghkap, jahkrit shama ai lam ni galaw wa sai rai nga ai.
KIA hte TNLA hpyen hpung ni a lapran, lamu ga mang hkang hta, madung gaw sut masa lam a majaw rai nna, Dima ginra hta TNLA hpyen hpung ni dap jung shara la wa ai kawn n-dai manghkang byin wa ai re lam na chye lu ai, Dai shara hta hpyen dap jung shara la wa ai lam hpe nra sharawng ai majaw Kuthkai, Namhpaka, Nam Um de na, Jinghpaw ramma ni kawn TNLA hpyen hpung ni hpe, ning hkap ai lam ni galaw wa sai re.
Ndai zawn byin nga ai manghkang hte seng na, wuhpung lahkawng maga na, lahta tsang Du kaba ni a lapran, bawngban ja hkrup taw ai lam ni nga tim, Lawu tsang hpyen dap kata manghkang ni matut byin nga ai re. 2025 January shata kawn TNLA hte KIA a laprang, lamu ga hte seng ai mang hkang ni laja lana byin wa sai rai tim, sai hkaw ai lam ni nnga hkra, myit a zim sha tawn let, mung masa lam hte a tsawm hparan sa wa na lam ni hte bawsang myusha sha da myit hkrum ai hte Myen hpyen hpe madung tawn shamyit sa wa na matu madung rai ra ai nga nna, KIA hte TNLA ning baw ni ndau wa sai re.
“Shi hte shi chyawm mung masha madung tawn na kaja ai hku dangdi ai daram shakut galaw taw nga ma ai ngu mu ai” nga na Namhkam hta shanu nga ai mung masha langai kawn, wuhpung lahkawng a masa hte seng nna, shi a ning mu tsun ai.
Lahta tsang madang de bawngban jahkrup nga ai rai tim, manghkang byin ni matut byin wa ai hpang, mung shawa ni a n-tsa garan ging hka ai lam ni byin wa ai hpe, ramma langai kawn tsun ai, “Ndai manghkang byin wa ai hpang kaw na, Gate hkan Balawng ni an hte hpe shaga yang loi ja ja nga shaga wa ai, shawoi dai hku n-byin shi ai sha loi dai zawn nre ai,” nga na Kuthkai kaw shanu nga ai ramma langai kawn tsun ai.
Jinghpaw mungdaw Manmaw muklum hta, ya ten majan laja lana byin taw ai re majaw, ndai zawn re manghkang ni byin nga ai rai tim, KIA kawn madung tawn nna, nlu hparan shi ai masa re lam chyelu ai.
