2025 ning April shata 15 ya shani Myen hpyen dap kawn, Hpakan hte Danai lapran, lido lam ntsa kaw nga ai, Lawa mare hpe nbung li bawm jahkrat gasat ai majaw hkala nba hkrum ai ni law ai hte mare mung hten nna, April 17 ya shani daram du hkra dum nta ni wan hkru ai lam matut manoi byin lai wa sai re hpe na chyelu ai.
Mare masha kade si nna, kade hkala nba hkrum ai hte seng nna gaw, tup hkrak nchyelu shi ai re.
Lai wa sai March shata 31 daram du hkra Lawa mare hta dap jung tawn ai, myen hpyen npu na, Jarit sin hpyen hpung ni hpe, Wunpawng Mungdan Shanglawt Hpyen Dap (KIA) hte pawng hpawm hpyen hpung ni htim gasat shapraw kau nna, Lawa mare hta KIA ni kawn shara la dap jung tawn ai rai nga ai. April shata praw 1 ya daram kaw nna Myen hpyen gumshem hpyen hpung ni kawn nbung li hte htim gasat ai lam ni galaw wa ai a majaw mare kata kaw nna, kalang bai htawt sit kau sai rai nga ai.
“Ndai shara hta anhte hpyen la ni madu da ai, nga da ai shara rai tim mung anhte gaw, anhte mung mare kata de majan nsha byin mayu ai, dai re ai majaw gaw galoi mung mare kata de majan byin wa na zawn rai yang hprang yen ai,” mare hta nga ai KIA magam gun langai kawn tsun ai.
Nnan byin wa ai ten kaw na myen hpyen dap gaw nbung li hte bawm wa ja hkrat, dai hpang laknak kaba ni hte bai gap bang rai na mare kata shang wa ai re lam chye lu ai.
“Shan hte (myen hpyen ni) gaw shawng gap sharu bang rai na shara wa la ai majaw, anhte gaw mare masha ni machyi na tsang ai majaw yen ra mat na, mare masha yawng pru sai hpang e she bai shang gap re lam ni rai nga ai” nga na lahta na magam gun wa kawn tsun ai.
“Dai kaw (Lawa mare) dai majan byin ai majaw hpakan wa na matu grai yak na sai, kaga lam hku bai kayin wa ra sa na, madaw manu mung grau ma sa na,” nga Myitkyina hta shanu nga ai hpakan mare masha langai kawn tsun ai.
Myen mung Lawu ga Mandalay, Sagaing , Naypyidaw hkan Nnang nawn laja lana byin nga ai ten KIA ni kawn April shata 22 ya shani du hkra, majan baw, htim gasat ai lam hpe n-galaw na lam ndau laika shapraw nna, tsun wa sai raitim, Myen hpyen ni kawn Jinhpaw mung de nbungli bawm ja hkrat gasat ai lam ni matut manoi galaw nga ai mung rai nga ai.
Majan a majaw, Lawa mare masha ni hprawng yen taw nga ai re hte, Mugawng , Nammati muklum de hprawng yen ai ni grau law ai re hte, nkau gaw Myitkyina de hprawng yen ai re lam chye lu ai. Majan laja lana naw matut byin wa na hpe mare masha ni tsang nga ai rai nna, aten galu rai wa sai majaw majan zim na hpe mare masha ni kawn myit mada nga ma ai lam chyelu ai. Mare masha ni gaw, ra ladawn nga ai arung arai ni, tsi mawan ni hte malu masha ni karum ya na hpe myit mada nga ai lam na chyelu ai.
