Myen hpyen dap kawn lai wa sai April shata 2 ya hta April 22 ya shani du hkra aten kadun gaphkat jahkring ai lam hpe ndau wa sai rai nna, gaphkat jahkring ai aten hpe April shata 30 ya shani du hkra bai jat dat ai lam, bawsang laknak hpung ni hpang de April shata 22 ya shani ndau shana ai shana wa sai rai nga ai.
Ndau laika hta Nnang Nawn kata hten za mat ai shara ni hpe bai gaw sharawt ai bungli matut galaw sa mat na re ai majaw dingbai dingna jaw ai lam n-galaw na matu shana tawn ai rai nga ai.
Myen hpyen asuya kawn hten za mat ai asuya rung ni, mung shawa ni a dum nta ni hpe byeng ai lam, mung masha ni ra ahkyat nga ai arung rai ni hpe karum madi shadaw ai lam ni hpe matut galaw sa wa nna, maigan mungdan ni a karum ningtum jaw ai lam ni mung matut galaw sa mat na re majaw, mungdan hte mung masha a sut masa, simsa ai lam lu la na matu madung yaw shada ai hte ndau shana ai re lam, Myen hpyen asuya a ndau laika hta ka da ai re.
Myen hpyen asuya kawn, aten kadun gap hkat jahkring ai lam, ndau wa sai raitim, bawsang laknak lang hpung ni hpe, hpyen nbungli hte matut manoi gasat wa sai mung rai nga ai.
2025 ning March shata 28 ya sha ni, Myen mung lawu ga ginra Mandalay, Nayhpidaw, Sagaing ginwang hkan byin mat wa ai N-nang nawn kaba mabyin a majaw Myen hpyen asuya sha n-ga, bawsang laknak lang hpung ni mung, gap hkat ai lam hpe aten kadun jahkring da na re lam ndau shana wa sai mung rai nga ai.
N-nang nawn mabyin a majaw Wunpawng Mungdan shanglawt Hpyen Dap (KIA) mung aten kadun gap hkat ja hkring ai lam ndau lai wa sai rai tim, Myen hpyen asuya kawn Jinghpaw mungdaw maga de hpyen gasat nbungli hte bawm jahkrat gasat ai hpe ya ten du hkra matut manoi galaw nga ai re.
N-nang nawn a majaw hten za mat ai nta hting ra ni jasan jaseng galaw ai lam grai naw ra nga ai lam na chye lu ai re. “ N-nang nawn (kaji) byin ai lam ni gaw ya zim wa sai, raitim lai wa sai lahkawng, masum ya hkan aten Second ပိုင်း daram shamu ai lam ni naw byin ai, hten za mat ai nta hting ra hkan na wut shadaw ni hpe gaw mare shinggan de kabai ai lam ni galaw ai, nkau gaw dai kabai ai maza hkan manu dan ai rai ni lawm ai kun nga nna tam ai lam galaw ma ai,” nga Mandalay kaw nga ai mung shawa langai tsun ai.
Myen hpyen dap gaw, shan hte shapraw da ai ndau shana laika hte maren nhkan nang ai rai yang, shan hte a hpyen dap hte, mung masha ni hpe makawp maga ai hku nna tara jeyang ai lam galaw sa mat na re lam, ndau laika hta ka tawn ai rai nga ai.
