Myen mung kata yawng jai lang nga ai mobile banking KBZ pay hpe jai lang n-na gumhpraw masu sha ai lam ni matut nna byin nga ai re hte N-nang nawn mabyin a majaw mung masha ni yakhkat nga ai ten, ndai zawn byin nga ai mung rai nga ai.
Grumhpraw masu sha ai ni gaw asak kaba ai ni, account nnan hpaw da ai hpe grau na madung tawn masu sha ai re lam chye lu ai. Tinang a Kpay hpe update galaw ra ai re hte update lawan nlu galaw yang account pat kau ra na re nga, masu sha ai ni gaw dai hku tsun nna, masu ai re lam chyelu ai.
“ Ya hte sha anhte nta makau na dwi la langai ma, masu hkrum ai, shan hte mung asak gaba sai, kasha ni jaw ai sha lu ai wa, matsan mayan she re” nga Mandalay hta shanu nga ai mung masha langai tsun wa ai.
Ndai zawn masu sha ai lam ni byin wa ai majaw, mung masha malawng ndai lam hte seng na grau sadi wa ai re hte, tinang a Phone number, NRC number ni njaw hkrup na matu , phone number hta sa wa ai code number ni njaw hkrup na matu hpe, masu hkrum ai mung masha ni kawn tsun shabra tawn ai rai nga ai.
“KBZ pay masu ai ni gaw madang grau tsaw ai hku masu wa ai, shang hte ma ဝန်ထမ်း ding sa ni lawm ai ma mai byin ai, hacker ni ma mai byin ai. Shan hte gara hku na phone number lu ai kun nchye ai. Ngai mung masu sha taw ai hpe chye ai majaw phone jahkrat kau ai , rai tim alang law law matut shaga taw ai, ngai mung n-lang na dai hku sha tawn kau ai,” nga kaga mung masha langai tsun ai.
Lai wa sai 2021 ning February shata 1 ya hta Myen hpyen kawn, mungdan a ahkang aya hpe maja zin madu la kau ai aten hkawn KBZ mobile banking gaw, mung masha ni a lapran grau jai lang wa ai re hte lai wa sai December shata 31 ya shani KBZ kawn ndai lam ni hpe lu hparan na matu grau na update byin ai application, biometric zawn re ai application ni hpe jai lang mat na hte, account madu langai sha mai chye ai pin number ni jahkrat ya na re lam ni hpe ndau shana wa sai rai nga ai.
Dai zawn shana wa sai rai tim, ndai ten masu ai manghkang ni jahkring hkring matut byin nga ai rai nna, KBZ kawn tatut lit la hparan ya ai lam ni n-nga shi ai rai nga ai. Ndai lam hte seng nna, KBZ bank de san shaga matut mahkai yu ai rai tim, kadai mung atsawm litla nna htai ya ai lam nnga ai re.
