2025 April shata 24 ya shani, Wunpawng Mungdan Shanglawt Hpyen Dap (KIA) hte pawnghpawm hpyen hpung ni kawn Manmaw kata ngam nga ai myen hpyen dap hpe lajan lana htim gasat ai lam bai hpang wa ai ten, Hpakan ginra hta mung myen hpyen dap kawn majan baw htim ga sat ai lam hpang wa nna, April shata 25 ya shani hta majan grau sawng wa ai lam chyelu ai.
Manmaw muklum kata hta April 25 ya jahpawt maga kawn myen hpyen dap Tsa-Ka-Hka-12, Hka-La-Ya-47 hte Manmaw Dakkasu shara ni hkan, laja lana gasat hkat hpang wa sai re hpe na chyelu ai.
“Myen hpyeng dap ni gaw majan hta galam (lagaw lam) hku htim gasat ai n-gun nlu shadat wa ai majaw nbungli hte htim gasat ai lam alang lang galaw wa ai re. Ndai 1 ya 2 ya lamang sha pi 9 lang,10 lang daram n bungli bawm jahkrat ai lam galaw ai,” nga shawng lam hta rai nga ai KIA hpyenla ni kawn tsun wa ai re.
Manmaw hta majan laja lana bai byin wa ai ten, myen hpyen ni kawn Hpakan maga de majan baw ai lam hpang wa ai re hpe na chyelu ai. Myen hpyen hpyen hpung ni gaw, Hpakan grup yin hta, KIA hte pawnghpawm hpyen hpung ni shara la dap jung tawn ai re majaw, hpakan de loi loi hte nlu shang taw ai lam na chye lu ai. Hpakan lung wa ai lam ding yang hta KIA hte pawnghpawm hpyen hpung ni kawn, Myen hpyen ni nlu lung wa hkra, lam ni pat nna hkap sin nga ai re lam chyelu ai.
“Dai na, lam ni yawng pat taw nga ai, anhte na nawku jawng kaw gaw ndu shi ai, anhte kaw na ni karum ai lam gaw galaw taw ai, raitim ya law law se, grai re na gaw nbyin shi ai, lam ni pat mat ai daram sha rai shi ai,” nga na Hpakan Sengtawn hta shanu nga ai mare masha langai tsun ai.
Hpakan de lungwa ai lam ding yang, Myen hpyen ni du nga sai mare hkan shanu nga ai mare masha ni kawn Hpakan ginra Jinghpaw Wunpawng Hkalup Hpung Ginjaw (KBC) nawku jawng hkan du nga sai re hte KBC Hpung hku nna mung hpyen yen wa ai mare masha ni hpe karum jaw ya nga ai lam chyelu ai.
KIA kawn N-nang nawn byin ai hpang daw de majan baw htim gasat ai lam ni hpe April shata 22 ya shani du hkra aten kadun gan jahking ai lam ndau wa sai re hte April 22 ya shani hpang daw kawn, Manmaw muklum kata majan baw htim gasat ai lam hpe bai hpang nga sai re.
KIA hpyen hpung ni kawn Hpakan de myen hpyen ni nshang wa lu na matu pat shing dang shakut galaw nga ai re hte Jinghpaw mungdaw de shawoi na hta grau nna majan laja lana bai byin wa na hpe mung masha ni hkrit tsang nga ai re lam chyelu ai.
