Loije Muklum hpe Wunpawng Mungdan Shanglawt Hpyendap KIA kaw nna zepzi zing madu la kau sai lam, Loije muklum na, ginra masha ni kaw nna, na chyelu ai.
Loije muklum kata hpang jahtum ngam nga ai HKLY-142 myen hpyendap kata na, Myen gumshem dap a magam gun ni hte hpyen la ni hpe, KIA kawn, 2024 ning April shata praw 8 ya shani hpang jahtum tawn nna, laknak jahkrat na matu sadi jaw da ai hte maren, April praw 8 ya shana myen mung ten hkying 10:30pm daram hta myen gumshem dap a magam gun ni hte hpyen la ni gaw, Miwa Mung kata de hprawng shang mat wa sai lam ginra masha ni hte wecchat ntsa pru wa ai shiga ni kaw nna chye lu ai re.
KIA hte pawng hpawm hpyen hpung ni kaw nna 2024 April shata praw 9 ya jahpawt kaw nna myen hpyen dap kata de shang jasan jaseng ai lam ni galaw nga ai re hpe mung, na chye lu ai.
Myen hpyen dap kata shang jasan jaseng galaw ai hta Laknak machyu pala Mawdaw kaba langai mi hpring hte Myen Gumhpraw Kyat Sen Mun mi jan hpe mung, padang dip la lu ai lam, na chye lu ai.
Lai wa sai 10 ning jan kaw nna pat tawn da ai, Loije hte Mai Ja Yang lapran na, lam kaba hpe mung 2024 ning, April shata praw 9 ya shani kaw nna, bai hpaw ya sai hte loije muklum kata KIA hte pawng hpawm hpyen hpung ni hku nna mung matut manoi shimlam gawan gatsan galaw nga ai lam na chye lu ai.
