ကချင်ပြည်နယ်မြောက်ဖျားပိုင်းရှိ ဆွမ်ပရာဘွမ်မြို့အခြေစိုက် စစ်ကောင်စီ၏ ခလရ ၄၆ တပ်စခန်းအား ကေအိုင်အေတပ်ဖွဲ့မှ ၂၀၂၄ ခုနှစ် မေလ ၅ ရက်နေ့၊ မြန်မာစံတော်ချိန် မနက် ၈ နာရီခန့်တွင် အပြီးသတ်တိုက်ခိုက်သိမ်းပိုက်လိုက်ကြောင်း ဒေသခံများမှ Ninghkawng သတင်းဌာနကို ပြောသည်။
ကေအိုင်အေတပ်ဖွဲ့နှင့် ပူးပေါင်းတပ်များသည် ၂၀၂၄ ခုနှစ် မတ်လ ၇ ရက်နေ့မှစပြီး၊ စစ်ကောင်စီ၏ တပ်စခန်းများကို တခုပြီးတခု တိုက်ခိုက်သိမ်းပိုက်လာခဲ့ရာ၊ ဆွမ်ပရာဘွမ်မြို့ရှိ ခလရ ၄၆ တပ်စခန်းကိုလည်း လအတန်ကြာ ဝန်းရံပိတ်ဆို့ထားခြင်းဖြစ်သည်။
ခလရ ၄၆ တပ်စခန်းတွင် ပိတ်မိနေသည့် စစ်အစိုးရတပ်သားများမှာ၊ စစ်တပ်၏ လေကြောင်းမှ တိုက်လေယာဉ်များ၏ ပစ်ကူမှုများကိုအားပြုပြီး ကြံ့ကြံ့ခံနေမှုကြောင့် ကေအိုင်အေမှ အဆိုပါတပ်စခန်းအား အပြီးသတ်သိမ်းပိုက်နိုင်ရန် အခက်တွေ့နေရခြင်းဖြစ်ကာ၊ သည်ကနေ့မနက် မေလ ၅ ရက်နေ့မှ သိမ်းပိုက်နိုင်ခဲ့ခြင်းဖြစ်ပါသည်။
အဆိုပါတပ်စခန်းအား တိုက်ခိုက်သိမ်းပိုက်လိုက်ပြီးနောက် ကေအိုင်အေတပ်ဖွဲ့မှ ဆွမ်ပရာဘွမ် မြို့အား အလုံးစုံထိန်းချုပ်လိုက်ပြီဖြစ်သည်။
တိုက်ပွဲပြင်းထန်မှုကြောင့် ဒေသခံများမှာ စစ်ဘေးလွတ်ရာသို့ ထွက်ပြေးတိမ်းရှောင်နေရပြီး၊ ကချင်ပြည်နယ်အထက်ပိုင်းရှိ ဆူးယန်၊ မိုင်ထောင်နှင့် ခဂရန်းယန် ကျေးရွာ ၃ ရွာကို နေရာသုံးခုခွဲပြီး စစ်ဘေးရှောင်စခန်း ၃ ခု ဖွင့်ထားကြောင်း အဆိုပါစစ်ရှောင်စခန်းကို သွားရောက်ခဲ့သည့် ဒေသခံတစ်ဦးကပြောသည်။
အဆိုပါစစ်ရှောင်စခန်းများတွင် စစ်ဘေးဒုက္ခသည် ၁၀၀၀ နီးပါး ခိုလှုံနေပြီး၊ စစ်ရှောင်များကို ခရစ်ယာန်ဘာသာရေးအသင်းအဖွဲ့များမှ ကူညီနေကြောင်း၊ အဆိုပါဒေသခံက ပြောသည်။
လွန်ခဲ့သော ၂၀၁၆ ခုနှစ် ဒီဇင်ဘာလတွင် လက်လွတ်လိုက်ရသည့် Gidon တပ်စခန်းအား ကေအိုင်အေနှင့်ပူးပေါင်းတပ်ဖွဲ့များမှ မေလ ၄ ရက်နေ့တွင် တိုက်ခိုက်သိမ်းပိုက်နိုင်ခဲ့ကြောင်း အတည်မပြုနိုင်သေးသည့် သတင်းရင်းမြစ်အရ သိရှိရသည်။
