ကချင်ပြည်နယ်ပူတာအိုမြို့ဘက်မှ ဆင်းလာသည့် စစ်ကောင်စီ (စကစ) လက်အောက်ခံစစ်ကြောင်းမှ ဆွန်ပီယန်ကျေးရွာကို မီးရှို့ဖျက်ဆီးနေကြောင်း ဒေသခံများက Ninghkawng သတင်းဌာနကို ပြောပါသည်။
နောက်ဆုံးသတင်းရရှိသည်အထိ ၄ အိမ် ၅ အိမ်နီးပါးမီးရှို့ဖျက်ဆီးခံခဲ့ရပြီးဖြစ်ကာ၊ မီးရှို့ဖျက်ဆီးနေသည့် စကစစစ်ကြောင်းကိုမူ မည်သည့်တပ်မှဖြစ်သည်ကို မသိရှိရသေးပဲ၊ ပူတာအိုဖက်မှဆင်းလာသည့် စစ်ကြောင်းဖြစ်ကာ၊ ကေအိုင်အေသိမ်းပိုက်လိုက်သည့် ဆွမ်ပရာဘွမ်မြို့ကို ပြန်လည်ထိုးစစ်ဆင်တိုက်ခိုက်ရန် ဖြစ်နိုင်ကြောင်း ဒေသခံကပြောသည်။
“၂၀၂၄ မေလ ၁၈ ရက်၊ စနေနေ့မှာ ဆွန်ပီယန်ကျေးရွာက အိမ်တချို့ကို မီးရှို့(ဖျက်ဆီး) ကြပါတယ်” လို့ ဒေသခံကပြောပါတယ်။
ပူတာအိုမြို့နယ်အတွင်းရှိ ဆွန်ပီယန်ကျေးရွာတွင် အိမ်ထောင်စုပေါင်း ၂၀၀ ကျော်ရှိပြီး၊ လူဦးရေ ၁၀၀၀ ကျော်ရှိကာ၊ တိုက်ပွဲများဖြစ်ပွားလာသည့်အတွက် ၂၀၂၄ ခုနှစ် မေလ ၁၁ ရက်နေ့မှစပြီး၊ ရွာသူရွာသား အားလုံးတောထဲသို့ ထွက်ပြေးပုန်းရှောင်နေရကြောင်း ဒေသခံများကပြောပါသည်။
“ရွာသူရွာသားတွေအားလုံး တောထဲ နေရာအနှံ့ထွက်ပြေးတိမ်းရှောင်နေတာကို၊ ပြန်စုပြီး၊ တနေရာမှာ စစ်ရှောင်စခန်းတခုဖွင့်ပြီး နေထိုင်ဖို့အတွက် ပြင်ဆင်နေပါတယ်” လို့ အဲသည့်ဒေသခံက ပြောပါတယ်။
လနှင့်ချီခုခံတိုက်ခိုက်နေသည့် ဆွမ်ပရာဘွမ်တွင်အထိုင်ချထားသော စကစစစ်တပ် ခလရ-၄၆ ကို ကေအိုင်အေနှင့် ပူးပေါင်းတပ်ဖွဲ့ဝင်များမှ ၂၀၂၄ မေလ ၅ ရက်နေ့မနက်ပိုင်းတွင် တိုက်ခိုက်သိမ်းပိုက်လိုက်ပြီးနောက် ဆွမ်ပရာဘွမ်မြို့ကို အလုံးစုံထိန်းချုပ်ခဲ့ခြင်း ဖြစ်ပါသည်။
လက်ရှိအချိန်တွင် ကချင်ပြည်နယ်အတွင်းရှိ မံစီမြို့နှင့် မိုးမောက်မြို့အတွင်းရှိ ပြည်သူများမှာ စစ်ဘေးလွတ်ရာသို့ ထွက်ပြေးတိမ်းရှောင်နေကြပြီး၊ စကစမှ လူမရှိတော့သည့် မြို့ထဲသို့ လက်နက်ကြီးများဖြင့် ပစ်ခတ်ခြင်း၊ လေယာဉ်ဖြင့်ဗုံးကြဲချခြင်းတို့ကို လုပ်ဆောင်နေသည့်အတွက် နေအိမ်များ၊ စျေးဆိုင်များ မီးလောင်ပျက်ဆီးခဲ့ရပါသည်။
