ကချင်ပြည်နယ်အတွင်းရှိ မံစီ၊ မိုးမောက်မြို့အတွင်းနှင့် ဗန်မော်မြို့အနီးတဝိုက် ၂၀၂၄ မေလ ၇ ရက်နေ့မနက် မြန်မာစံတော်ချိန် မနက် ၅ နာရီ အချိန်မှစပြီး၊ စစ်ကောင်စီတပ်ဖွဲ့များနှင့် ကေအိုင်အေနှင့် ပူးပေါင်းတပ်ဖွဲ့တွေအကြား တိုက်ပွဲများပြင်းထန်စွာ ဖြစ်ပွားလာခဲ့ပါသည်။
ကေအိုင်အေနှင့် ပူးပေါင်းတပ်ဖွဲ့တို့သည် မံစီနှင့် မိုးမောက်မြို့အတွင်းရှိ စစ်ကောင်စီတပ်ဖွဲ့များကို တိုက်ခိုက်ပြီးနောက်၊ အဆိုပါမြို့များမှ ရဲစခန်းတို့ကိုသိမ်းပိုက်လိုက်ပြီး၊ ဗန်မော်မြို့အနီးရှိ တပ်စခန်းများကိုလည်း ဝင်ရောက်တိုက်ခိုက်ခဲ့ကာ ဗန်မော်နှင့် ရွှေကူမြို့ကြားရှိ စင်းခန်းမြို့ကိုလည်း တိုက်ခိုက်သိမ်းပိုက်လိုက်ကြောင်း ဒေသခံများကပြောသည်။
“မံစီမှာကတော့ သည်ကနေ့မနက်ကနေစနေပြီ၊ လက်နက်ကြီးတွေနဲ့အရင်ဦးဆုံး ပစ်ခတ် တိုက်ခိုက်နေကြပါတယ်,” လို့ ဒေသခံတဦးက Ninghkawng သတင်းဌာနကို ပြောသည်။
သတင်းရေးနေသည့်အချိန်တွင်၊ မိုးမောက်မြို့အား ကေအိုင်အေနှင့် ပူးပေါင်းတပ်ဖွဲ့များမှ သိမ်းပိုက်လိုက်ပြီဖြစ်ကြောင်း အတည်မပြုနိုင်သေးသည့် သတင်းများအရ သိရှိရသည်။
မံစီမြို့ရှိ ရဲစခန်းအားတိုက်ခိုက်သိမ်းပိုက်လိုက်ပြီးနောက်၊ နေ့လည် ၁၁ နာရီခန့်တွင် ပစ်ခတ် တိုက်ခိုက်မှုများ ခနတာငြိမ်သက်သွားပြီးနောက်၊ စစ်ကောင်စီသည် တိုက်လေယာဉ်သုံးပြီး ဗုံကြဲတိုက်ခိုက်မှုများကို ပြုလုပ်လာခဲ့ကြောင်း ဒေသခံများကပြောသည်။
“ဗုံးပေါက်ကွဲသံတွေကတော့ ဆက်တိုက်ကြားနေရပါတယ်၊ ခုနကလေယာဉ်နဲ့ ၂ ကျော့ပြန် ဗုံးကြဲသွားခဲ့ပါတယ်၊ ခုလေးတင်ဘဲ နောက်တကြိမ်လာကြဲသွားပါတယ်၊ (ပေါက်ကွဲသံကတော့) နှလုံးပျက်မတတ်ပါပဲ,” လို့ အဆိုပါဒေသခံက ပြောပါတယ်။
မံစီမြို့တွင်းထဲတွင် တပ်စိုက်နေရာယူထားသည့် စစ်တပ်မရှိတော့သည်မှာ ကြာပြီဖြစ်သော်လည်း၊ မကြားသေးသည့်အချိန်အတွင်း မြို့အနီးပတ်လည်မှ ၎င်းတို့၏တပ်စခန်းများ ကေအိုင်အေ လက်အောက်သို့ကျရောက်သွားခဲ့ပြီးနောက်၊ အဆိုပါတပ်စခန်းများမှ စစ်ကောင်စီတပ်သားများမှာ မံစီမြို့တွင် လာရောက်စုရုံးနေကြခြင်းဖြစ်ကြောင်း၊ အဆိုပါဒေသခံကပြောသည်။
မံစီမြို့နှင့် ဗန်မော်မြို့ကြားတွင် စစ်ကောင်စီ၏ တပ်စခန်း ၂ ခု ကျန်ရှိနေပြီး၊ အဆိုပါနေရာတွင် တိုက်ခိုက်မှုများ ပြင်းထန်နေကြောင်း၊ ဒေသခံကပြောသည်။
