Sumpra Bum mare kaw dap jung shara lada ai, Myen Hpyen Dap Hka-La-Ya (46) hpe, 2024 ning May shata praw 5 ya jahpawt, myen mung ten 8:00 am hta, Wunpawng Mungdan Shanglawt Hpyendap (KIA) kawn, tsep kawp zing madu la sai lam, buga masha ni, Ninghkawng shiga dap de tsun ai.
KIA hte pawng hpawm hpyen hpung ni kawn, 2024 March shata praw 7 ya shani kaw nna, myen hpyendap ni hpe, htim gasat zing madu la hpang wa sai re hte, Sumpra Bum myen gumshem a dap hpe gaw, shata galu, wang shinggrup da ai rai nga ai.
Myen hpyendap Hka-La-Ya (46) na hpyen la ni gaw, dap kata shata galu chyat rawng nga ai re hte, myen hpyendap a hpyen nbungli ni, shan hte hpe, wa gap garum nga ai re majaw, KIA kawn, zing madu lu na matu, yak taw ai hta, dai ni, May shata praw 5 ya jahpawt hta gaw, padang dip zing la lu ai mung rai nga ai.
Majan laja lana byin nga ai majaw, buga mare masha ni gaw, hpyen koi yen nga ai re hte, ya ten hta, Hka Hku ginwang hpyen yen dabang hpe shara (3) garan nna, hpaw tawn da ai re lam, buga masha ni tsun ai.
Hpyen yen dabang ni hpe, “Su Yang, Mai Htawng hte Hka Garan Yang mare ni hta,” hpaw taw da ai re nga, buga masha ni tsun ai.
Dai hpyen yen dabang masum hta, hpyen yen 1000 mi daram shanu shingbyi nga ai re hte, hpyen yen ni hpe, Hkristan nawku hpung na, hpung sara, sarama ni, yu lakawn nga ai re lam, hpyen yen dabang de sadu kawan ai, kanu kana langai tsun ai.
Laiwa sai 2016 ning December shata hta, myen hpyen gumshem a lata de, tat sum kau ai, Gidon bum hpe mung, KIA hte pawng hpawm hpyen hpung ni gaw, May shata praw 4 ya shani hta, padang dip zing la lu sai lam, na chyelu ai.
