2025 ning March Shata 28 ya shani ka-ang aten ram hta n-gun 7.7 ram nga ai Nnang nawn kaba gaw, Sagaing hte Mandalay ginwang mayan byin wa sai hpang, n-gun kya ai, Nnang nawn ni matut manoi byin wa sai mung rai nga ai.
Nnang nawn hte seng nna, April Shata 5,6 daram du hkra naw la yu ra na re lam, Nnang nawn hte seng ai, chye chyang ai ninghkring ni ndau tsun wa sai re hte April 13 ya shani hta mung kalang bai byin wa sai rai nna, March shata 30, 31 shani hkyin 1 chyen grup yin aten ni hta mung, matut manoi byin wa sai rai nga ai.
Nta nhten mat ai Mandalay muklum na mung shawa ni gaw, nta kata nyup gwi mat nna, nta shinggan hkan yup nga ai re hte, Nnang nawn byin ai ten nhten mat ai, nkau nta ni mung, hpang daw de hten run, galau mat ai law law byin nga ai re hpe chyelu ai.
March shata 28 ya shani na, Nnang Nawn hta, asak si sum ai masha nlaw htum hkying 3 jan wa sai re hte hkala nba hkrum ai masha 2000 jan du sai rai nna, nmu tam shi ai masha ni grai naw nga ai re lam chyelu ai. Matut nna masha hkye ai lam naw galaw taw nga ai hta Myen mung hta karum na masha, jak rai ni nlaw ai majaw kaga maigan mungdan de na wuhpung ni, karum ningtum lam amyu myu jaw nga ai re.
Nnang Nawn a majaw jamjau hkrum nga ai mung dan masha ni hpe karum jaw ya na matu, maigan mung dan de na, wuhpung ni sa du karum jaw wa nga ai re hte, America, India, Singapore, China, Malysia, Russia hte Japan mungdan de na ni re lam chye lu ai. Karum jaw ya na matu Taiwan mungdan ni mung Yangon nbungli daru du hkra du shang wa sai raitim, nbungli daru hta jep joi ai lam aten grai na mat ai re hte shan hte bai nhtang wa mat ai lam na chye lu ai. Miwa hte Taiwan mungdan a lapran byin nga ai manghkang a majaw ya na zawn byin ai re nga, mung shawa ni sawn maram tsun nga ai re.
Jinghpaw Wunpawng Hkalup Hpung Ginjaw (KBC) kawn Nnang nawn a majaw jam jau hkrum nga ai mung masha ni hpe Myen gumhpraw kyat sen 2,500 Karum mat na re lam ndau wa sai re. Mandalay Lawu ga ginwang KBC hpung ni kawn karum gahtau hte seng nna lit la galaw sa mat na re lam na chye lu ai. Matut nna hpung masha ni kawn Nnang nawn a matu karum gumhpraw ni matut jaw bang ya na matu, KBC amu madu Rev. Hpauyawng Tu Mai kawn tsun shana wa sai re.
Laban shani shagu Nnang Nawn a matu karum gumhpraw ni hpe hta shinggyin mat na re lam na chye lu ai.
Myen mung Sagaing ginwang de karum ningtum ni du ai lam naw yawm taw ai a majaw masha si ai lam grau law nga ai re nga Mandalay de du wa ai Sagaing maga na, mung masha langai kawn tsun ai. Mandalay, Naypyidaw hkan karum ai lam ni grai nga tim Sagaing maga gaw grai naw yawm taw ai re majaw, karum ningtum ni hpe n-gun dat nna, jaw ya na matu mung masha ni hpyi shawng taw nga ai re. Nnang nawn byin nga ai ginra ni hta lu hka, malu masha, myihprap wan, tsi mawan ni madung ra ahkyak taw ai re lam na chye lu ai.
