Lai wa sai 2024 ning August shata hta pawng hpawm hpyen hpung ni hte rau zing madu da ai, Sam mung Lasho muklum kata kaw na Kokang (MNDAA) hpyen hpung ni htawt sit ai lam hpe galaw hpang wa sai rai nga ai.
MNDAA hpung ni hpe Lasho kawn htawt sit na lam hte seng nna, 2025 ning March shata 22 ya shani kawn Miwa mung Yunan mungdaw kata hkrum zup bawngban ai zuphpawng hta myit hkrum dawdan ai lam galaw wa sai rai nna, dai myit hkrum lam hta 2025 April shata 21 ya hpang ja htum tawn nna, MNDAA hpyen hpung ni Lasho muklum kaw na htawt sit kau ra na ngu ai lam mung lawm ai rai nga ai.
Ndai zawn, myit hkrum ai lam gaw, MNDAA hpyen hpung ni, Miwa asuya a dip n-gun jaw ai lam ni hpe lang hte lang hkrum sha wa nna galaw ai re hte, shawngdaw de MNDAA hpung kawn myit hkrum ai lam n-nga ai majaw, Miwa asuya kawn, Lasho kata tsi mawan hte laga ra ahkyat ai malu masha, jat sau zawn re ai ni, htaw shalai dut sha ai hpaga ni hpe pat kau ya ai lam ni galaw ai sha n-ga, MNDAA hpung a ning baw ni hpe mung Miwa mung kata rim da ai lam ni galaw nna, dip n-gun jaw ai a majaw, Kokang hpyen hpung gaw, ya na zawn dawdan ra wa ai masa re lam, Kutkai muklum hta shanu nga ai Lasho mare masha langai kawn tsun wa ai re.
Ya na zawn, Kokang hpyen hpung ni, Lasho muklum kawn htawt sit ai hta, majan kata rim tawn ai hpyen bawng (စစ်သုံးပန်း) nkau hpe mung woi mat wa ai lam na chye lu ai. MNDAA hpyen hpung a lata hta rim hkrum tawn ai mara lu (ရာဇဝတ်မှုကျူးလွန်) nna htawng dam jahkrat da ai masha ni hpe gaw, Tara je yang ai lam ni matut galaw nga ai hpe chyelu ai.
Ya na zawn, Lasho muklum hpe MNDAA hpung ni myen hpe bai jaw kau ai majaw, Balawng (TNLA) hpyen hpung ni mung, Lasho makau na, shan hte zing madu da ai shara ni hpe myen hpyen hpung ni bai htim gasat zing wa na masa hte hkrum nga sai lam, buga masha ni sawn maram tawn ai re.
“Lasho, myen ni hpe jaw kau sai re majaw, Balawng (TNLA) ni na matu jam jau wa sai ga rai nga ai, Lasho waw ra maga, shan hte zing da ai Kyaukme (muklum) zawn re maga de myen ni bai shang wa na rai nga ai,” nga Lasho muklum na, buga masha langai tsun ai.
Sam mung ginra hta shanu nga ai mare masha ni gaw, majan laja lana bai byin hpang wa na hpe myit tsang taw nga ai lam chyelu ai.
MNDAA ni kawn Lasho majan hta hkrat sum mat sai share shagan ni hpe myit dum, shagrau ai masat masa ni hpe galaw lai wa sai rai nna, majan a majaw hten za mat ai nta ni bai gram lajang lu na matu nta shagu hpe kyat sen 50 hpra jaw ai lam ni ga law nga ai re hpe na chye lu ai.
Lasho muklum kata mare lawk 12 daram hpe Myen hpyen asuya a lata de ap jaw ra na re hte, nkau mare lawk ni hpe gaw MNDAA ni up hkang ai lata npu kaw naw tawn da na ahkang lu ai a majaw, Myen hpyen asuya up hkang ai npu nkam nga ai mare masha ni gaw, MNDAA up hkang ai mare lawk de mai htawt sit nga na re lam chyelu ai.
